Kơdră Quốc hội Trần Thanh Mẫn pơma hơdăh Việt Nam ling lang năng kăl păng tơgŭm hơdrol hlŏh lơ̆m tơdrong pơvei ‘lơ̆ng hơiă, gĭt kăl, mât 1 ƀơ̆r đon păng jang hơdoi tôm tơdrong hăm Đảng, teh đak păng kon pơlei Lào. Tơ̆ hơnăp kơnh, Kơdră Quốc hội athei 2 teh đak hơtŏk tơdrong pơgơ̆r ăn khul jang tih tơƀâp pơma nuh, jang hơdoi kơjăp, tơgŭm ăn tơ̆ dôm hop akŏm, khul jang lơ pang tơ̆ tơring păng lơ̆m apŭng plenh teh.

Dôm khul grŭp tơpôl kơ kon pơlei 2 teh đak, tơm hlŏh jĭ dôm Khul jang tơbôl Việt Nam păng Anih vei rơngei Việt Nam, Anih vei rơngei păng mât 1 ƀơ̆r đon Lào jang hơdoi mă kơjăp hlŏh dơ̆ng, pơgơ̆r lơ tơdrong pơtho pơhrăm găh chinh trĭ, đon tơchĕng, mă loi jĭ ăn jơhnơr mơlôh găh chăl arih sơ̆, dôm tơdrong juăt ‘lơ̆ng, tơdrong mât jơhngâm đon, pơvei băl ‘lơ̆ng hơiă đơ̆ng Việt Nam – Lào.