‘Nâu jĭ jơ hŏk hôp hơnơ̆ng kơ Grŭp jang “Rong pơtho kon ‘lơ̆ng” đơ̆ng khŭl drŏ kăn thôn 1, xăh Đưng K’Nớ, apŭng Lạc Dương, dêh char Lâm Đồng. Đei pơjing lơ̆m khei 8 sơnăm 2012 hăm 10 ‘nu bơngai jang, truh dang ei, Grŭp jang hlôi đei 61 ‘nu vang jang. Mŏ Bon Niêng K’Pớt, Kơdră vei lăng Grŭp jang tơbăt, hơdrol sơ̆ mŏ oh drŏ kăn thôn 1 hlôh vao oei tam mă lơ hơnhăk truh tơdrong vei lăng, rong pơtho kon hơ ‘lơ̆p, pơjing ŭnh hnam tam mă hơgei, iŏk đơ̆ng đei Grŭp jang truh dang ei, mŏ oh hlôi ƀrư̆ ƀrư̆ hơtŏk ‘lơ̆ng hlôh vao, đei tơdrong bơngơ̆t truh vei lăng đe kon tôm ƀiơ̆:

“Iŏk đơ̆ng pơjing Grŭp jang truh dang ei ‘noh mŏ oh hlôi băt đei hơnăp jang đơ̆ng drŏ kăn lơ̆m tơdrong arih sa mŭk drăm tơpôl păng ŭnh hnam. Kơsô̆ rơneh kon mă 3 jur lơ. Sơ̆ dang 50%, oei dang ei đei 10% đĕch. Kơsô̆ hơkĕ hơkong kŭm jur lơ, hơdrol kơ tam mă đei grŭp jang kơsô̆ hơkĕ hơkong hloh 45%. Bơngai jang lơ̆m grŭp jang đei kon hơlăng, hŏk hơgei ngăl, kơ sô̆ hŭt hŏk mơlôh mơ lônh kŭm dă ƀiơ̆ tôch kơ lơ.”

Hăm lơ trong jang nhen: Pơma đam, tơl tơƀlang, asong hla ar, tơroi tơbăt hăm ƀơ̆r, pơngôi phĕ pơkao đei chih chư... păng tơgep lơ tơdrong tơroi tơbăt, Grŭp jang hlôi hơmet ăn kơ bơngai jang lơ̆m khŭl dôm tơdrong hlôh vao găh Luơ̆t iŏk ŭnh om, rơneh đei tang găn, trong sŏng sa ‘lơ̆ng ăn drŏ kăn oei hơnăp, trong vei lăng, rong pơtho kon ‘lơ̆ng, pai dôm ‘măng sŏng sa bek ‘lơ̆ng tôm kơchơ̆t păng dôm tơdrong jang tang găn jĭ vă kơ kon tih vơ̆ pran jăng... Mŏ  Rơ ông K'Yồng, bơngai jang lơ̆m grŭp jang tơroi:

“Sơ̆ ƀơ̆t tam mă vang jang lơ̆m Grŭp jang ‘noh lăp sa ‘nhot hăm por đĕch, dang ei ‘noh băt pai sa ăn kơ kon, đei kơtăp iĕr, bip, đei ‘nhĕm ‘noh ĭnh pai ăn kơ mon sa sư đei kơchơ̆t ƀiơ̆.”

Kiơ̆ dôm jơ hŏk hôp, lơ mŏ oh pơ̆n ƀiơ̆, kơchăng chă hơlen lăng dôm tơdrong găh rong pơtho kon, vei lăng ŭnh hnam, kiơ̆ đơ̆ng noh tơmơ̆t yua lơ̆m tơdrong arih sa. Gơnang đơ̆ng noh ŭnh hnam bơngai jang lơ̆m khŭl roi hiôk chơt hloh dơ̆ng. Mŏ Bon Niêng Kđơng, đei hloh 1 sơnăm hŏk hôp tơ̆ Grŭp jang tơroi:

 “Đei đe mŏ oh tơroi găh tơdrong hlôh vao rong pơtho kon lơ̆m ŭnh hnam, đơ̆ng noh băt răp mơ̆ng păng hlôh băt pơlung kon vă tơgŭm kon yak hloh dôm tơdrong mơmat tat.”

Ƀok Bon Niêng Ha Krai, Phŏ Kơdră Anih vei lăng kon pơlei xăh Đưng K’Nớ tơbăt, thôn 1 dang ei đei 207 ŭnh hnam kon pơlei, 859 ‘nu bơngai hăm hloh 90% ‘noh bơngai kon kông. Iŏk đơ̆ng Grŭp jang bơ̆jang, hlôi tơgop pơm tơplih đon hlôh vao đơ̆ng kon pơlei. Gơnang đơ̆ng noh, hloh 10 sơnăm âu ki, lơ̆m thôn 1 ưh kơ đei hơioh hơ kĕ hơkong, ưh kơ đei hŏk tro hŭt hŏk; 5 sơnăm tơ jê̆ âu ưh kơ đei bơngai iŏk ŭnh om hrôih, oei băl hơgăm, đĭ đăng hơioh lơ̆m sơnăm hŏk tă kơ đei truh tơ̆ hnam trưng ngăl, đĭ đăng ŭnh hnam iŏk đei ŭnh hnam oei sa ‘lơ̆ng hơiă.

“Lơ̆m khei ‘năr âu ki Grŭp jang âu đei lơ jơnei, mă loi ‘noh jĭ lơ̆m tơdrong jang rong pơtho kon ‘lơ̆ng, ưh kơ đei ƀôh tơdrong teh dong băl lơ̆m ŭnh hnam, pơm glăi tơpôl. Kơdră kơpal kŭm đei lơ ƀăng khen, hla ar pơ ư vă pôk pơ ư Grŭp jang ‘nâu. Tơ̆ hơnăp kơnh, kiơ̆ lơ̆m hơtŏk tơiung đơ̆ng Grŭp jang ‘nâu ‘noh pơih să tơ̆ dôm pơlei, lăng ‘nâu jĭ hơnih gơnang, ƀơm ‘lơ̆ng vă păr ang lơ̆m rim pơlei.”

Grŭp jang “Rong pơtho kon ‘lơ̆ng” tơ̆ thôn 1, xăh Đưng K’Nớ hlôi hơtŏk đei yua hăm lơ tơdrong jang ‘lơ̆ng păng tơ pă jing gơng tơƀưh tơgŭm mŏ oh pơma dơnuh, chĕp vei dôm tơdrong hlôh vao hơiă, đei yua găh rong pơtho kon, kŭm nhen trong pơma sa hăm ŭnh hnam păng tơpôl, tơgop pơjing pơlei pơla roi pơdrŏng ‘lơ̆ng, ŭnh hnam dôm bơngai jang lơ̆m khŭl roi hiôk chơ̆t dơ̆ng.