Đơ̆ng blŭng sơnăm truh dang ei, tơdrong jang dăr hơlen, hơlen lăng đei tơlĕch jang hrơ̆ch 1 ‘măng, kơtang, đei tơdrong mơ̆t jang đơ̆ng dôm Anih tơm: vei lăng jang Pơgang, Choh jang sa păng Hơtŏk tơiung tơring tơrang, Mơdro sa Kơmăy kơmŏk, Kŏng an, Khoa hŏk păng Kơmăy kơmŏk, Anih jang Mặt trận tổ quốc Việt Nam rim dêh char, pơlei tơm, Khŭl vei lăng kon pơlei jang chŭn mir, Khŭl vei lăng drŏ kăn.... vang jang hơlen lăng vei sơđơ̆ng rơgoh ‘lơ̆ng tơmam sa lơ anih jang, chă băt anih pơm tơlĕch tơmam sa, chih hơnăn tơmam ưh kơ ƀlep tơdrong hơgăt.

Jô̆ lăm 6 khei blŭng sơnăm ‘nâu, lơ̆m anih jang pơgang hlôi hơlen lăng hloh 232 rơbâu hơnih jang, chă ƀôh hloh 15 rơbâu anih jang pơm glăi găh vei rơgoh ‘lơ̆ng tơmam sa, hlôi phak hloh 3.300 hơnih pơm glăi, lơ̆m noh phak jên vă jê̆ 2.300 hơnih hăm kơsô̆ jên vă jê̆ 20 ti hlak jên, jur pơting hăm khei ‘nâu sơnăm 2023. ‘Ngoăih kơ phak jên oei tơmơ̆t yua phak thim păng hơmet pơ ‘lơ̆ng hiong răm, ăn pơdơh kơ jang 16 hơnih, 745 hơnih athei soh hŭt tơmam ưh kơ ‘lơ̆ng.

Dôm anih tơm, anih jang hlôi jang hơdai kơjăp hăm dôm tơring vei lăng, hơmet ‘lơ̆ng hơmơt kơ ‘mê̆ ‘mach tơmam sa, pơtho tơring tơlĕch jang dăr lăng dôm tơdrong krê hơmơt ‘mê̆ ‘mach tơmam sa, vei sơđơ̆ng tơdrong jang vei lăng rơgoh ‘lơ̆ng tơmam sa, tang găn pơnhŭl tơmam sa, vei sơđơ̆ng rơgoh ‘lơ̆ng tơmam sa lơ̆m năr lêh tih. Tơdrong pơnhŭl tơmam sa, lơ̆m teh đak chih iŏk 70 ‘măng pơm vă jê̆ 3 rơbâu ‘nu jĭ păng 12 ‘nu lôch.

Yă Phạm Khánh Phong Lan, Kơdră vei lăng Anih vei sơđơ̆ng rơgoh ‘lơ̆ng tơmam sa pơlei tơm Hồ Chí Minh tơbăt: tơdrong pơnhŭl tơmam yua đei ƀôh krê hơmơt lơ̆m hơnih pai gŏ sŏng sa tơpôl, et pơkong, et kơ nê̆ hơkâu, hơnih tĕch tơmam sŏng sa. Mơmat tat tih hloh ‘noh jĭ đei ƀôh kơ chơ pơm kơdih, tĕch tơmam ưh kơ ăn phep, mă loi ‘noh tĕch lơ̆m mạng: “Tơdrong mơmat tat tih hloh, mă loi ‘noh jĭ đơ̆ng rŏng jĭ hơbuh ‘noh tơdrong đei ƀôh găh dôm kơchơ pơm kơdih, găh dôm hơnih tĕch ưh kơ ăn phep. Tơdrong mă tĕch lơ̆m mạng kŭm jing 1 trong ưh kơ ăn phep yua kơ lơ̆m noh đe sư roi tơƀôh tôm tơmam mă lei ưh kơ đei kiơ vei sơđơ̆ng ôh. Pơlei tơm ‘noh kŭm hlôi pơjing 1 grŭp bơ̆jang gĭt kăl, mă loi ‘noh jum dăr tơring dôm kơchơ tơm tĕch mơdro ‘noh nhôn vei lăng, dăr hơlen đang kơ ‘noh nhôn iŏk tơmam hơlen lăng, mă lei tơ̆ ‘ngoăih, đe sư truh ba lơ tơmam tĕch kư̆ kă, ƀơ̆t lăp tơmam kŭm đơ̆ng lơ̆m kơchơ tĕch tơ̆ ‘ngoăih, ƀôh anih jang kơpal ‘noh lôm pơdŭ kơdâu păng tơdrong hơlen lăng, vei lăng âu tôch kơ mơ mat.”

Tang măt dôm Anih tơm, anih jang kŭm bơngơ̆t găh tơdrong jang hơlen lăng đơ̆ng rŏng ưh kơ tôm bơngai jang, dôm trong jang hơtŏk loi dơ̆ng hơlen lăng tơmam sa iĕ le, tơmam sa trong kơphô̆ tŏk bŏk akŏm hơnăp jang ăn anih jang tơring. Mă loi ‘noh, dôm tơmam găh đak toh, hơlăk ƀier mơmat vei lăng, ƀơm ưh kơ ‘lơ̆ng truh tơdrong đei yua trŏ luơ̆t đơ̆ng hơnih pơm tơlĕch păng bơngai răt yua. Hơdai hăm ‘noh, dôm bơngai tang măt tơtăm găh tơdrong pơm hơtŏk kơdih tơmam akhan ‘lơ̆ng, pơm glăi roi tơƀôh, chă hơlĕnh roi tơƀôh tơmam ‘lơ̆ng. Tang măt Anih tơm vei lăng găh tơdrong kơtơ̆ng ang păng tơroi tơbăt akhan kăl kơ tang găn roi tơƀôh klĕch tơring sơlam, găn đĭ anih pơtruh, sek phak lơ̆m tơ ‘ngla, tŭn tơdrong phak tŏk lơ. Athei ưh kơ ăn tĕch mơdro hăm điện tử livestream tĕch tơmam….

Kiơ̆ kơ Thiếu tướng Nhữ Thị Minh Nguyệt, Phŏ Kơdră anih jang kanh sat tang găn pơm glăi găh cham char, Anih tơm vei lăng Kŏng an, tơdrong tĕch mơdro tơmam ưh kơ băt hơdăh hơnih pơm tơlĕch, ưh kơ vei rơgoh ‘lơ̆ng tơmam sa, tĕch hơdăh dôm tơmam ưh kơ băt hơnih pơm tơlĕch, ưh kơ đei rơgoh ‘lơ̆ng tơmam đei ƀôh rơđăh. Dôm tơdrong pơm glăi iŏk yua hơnih mạng, tĕch mơdro lơ̆m điện tử, đei ƀôh roi tŏk. Dôm bơngai iŏk yua tơmam ưh kơ băt hơdăh hơnih pơm tơlĕch, sut khei ‘năr pơkăp gơh yua.... trong tĕch mơdro lơ̆m mạng pơm ăn lơ mơmat tat lơ̆m tơdrong vei lăng, sek phak. Thiếu tướng Nhữ Thị Minh Nguyệt tơroi nơ̆r tơgop: “Nhôn kŭm athei Khŭl kơdră teh đak jăh hơmet tơplih tôm tơdrong jang vei lăng teh đak găh vei sơđơ̆ng rơgoh ‘lơ̆ng tơmam sa kiơ̆ trong drơ̆ng nơ̆r 1 hơnih tơm đơ̆ng Trung ương truh tơring, vă vei sơđơ̆ng hơnăp jang vei lăng đơ̆ng rim anih jang, rim kơdră păng mă loi ‘noh jĭ tơdrong hơgăt hơnăp jang hơdăh lơ̆m vei lăng 1, 2 kơ loăi pơm tơlĕch tĕch mơdro tơmam tŏk bŏk oei đei lơ pơm glăi păng hơmơt ưh kơ rơgoh ‘lơ̆ng tơmam sa nhen hrei ‘nâu. ‘Noh jĭ pơm tơlĕch tĕch mơdro iĕ le tĕch mơdro tơmam sa trong kơphô̆ păng pơm tơlĕch hơlăk, âu ki đei lơ bơngai pơnhŭl đei ƀôh, đei lôch bơngai yua đơ̆ng hơlăk pai kơdih.”

Tơ̆ jơ hop akŏm, Phŏ Thủ tướng Lê Thành Long hơlen lăng, tơdrong jang vei lăng rơgoh ‘lơ̆ng tơmam sa hlôi đei hơdrin lơ păng iŏk đei dôm jơnei ‘lơ̆ng. Dôm trong jang tơlĕch ăn tŏk bŏk năm ƀlep trong păng hơtŏk đei yua. Mă lei oei đei lơ tam mă ‘lơ̆ng, đei ƀôh ‘noh jĭ hơmơt tơmam sa ưh kơ rơgoh đei ƀôh, tơdrong pơnhul tơmam sa, kơ sô̆ bơngai pơm glăi tŏk, trong phak tam mă kĕ tơhli. Phŏ Thủ tướng Lê Thành Long athei: “Ĭnh ƀôh akhan ‘noh jĭ vei rơgoh ‘lơ̆ng tơmam sa, tơdrong băt kơchăng đơ̆ng kon pơlei, pơjing tơdrong joăt păng lơ lăp dang yơ ‘noh krao ‘noh băt răt yua, ‘noh mă kơjăp, mă khan iĕm đei hơtŏk dơ̆ng truh 10 ‘măng khŭl jang năm hơlen lăng rim tơring oei ưh kơ jăp ‘mơ̆i. Pơm liơ pơjing tơdrong joăt păng tơƀôh trong răt yua hơgei ‘noh tôch kơ gĭt kăl, đei tơdrong ‘lơ̆ng ƀơ̆t măt hai păng đei tơdrong ‘lơ̆ng đunh đai hai. Lăp ‘noh dôm Anih tơm, anih jang lơ̆m hơnăp jang đơ̆ng kơdih păng kon jên tơmam đơ̆ng kơ dih vă hơtŏk loi dơ̆ng tơdrong jang hơlen lăng ưh kơ ê păng mưh chă ƀôh đei ‘noh athei phak tơpăt, hơdai hăm tơroi tơbăt găh tơdrong ‘noh vă tơƀôh đon băt”.