Anih jang pơgang hơmet jĭ jăn dêh char Kon Tum tŏk bŏk oei tơlĕch lơ trong jang vă tang găn păng hơmet pơlŏ tŏ lĕch đe hơbuh hli. Khei 8 âu ki, anih jang pơgang hơmet jĭ jăn dêh char Kon Tum băt đei 71 ‘nu bơngai ƀơm pơlŏ tŏ lĕch đe, tŏk 20 ‘nu pơtêng hăm khei hơdrol. Lơ̆m tơring băt đei lơ bơngai ƀơm jĭ hloh noh tơ̆ apŭng Kon Braih hăm 26 ‘nu bơngai ƀơm jĭ păng 8 lơ̆m 10 apŭng, pơlei tơm kơ dêh char adoi đei bơngai ƀơm jĭ ngăl.

Kiơ̆ ƀak sih chuyên khua 2 Đỗ Ngọc Hoà, Phŏ Kơdră Anih jang pơgang hơmet jĭ jăn dêh char Kon Tum, pơlŏ tŏ lĕch đe hơbuh tơ̆ tơring ưh đei kiơ̆ 3 sơnăm minh ‘măng, mă nhen lĕ sơnăm mă yơ adoi đei jĭ kiơ̆ kơ pơyan. Dang ei dêh char Kon Tum tŏk bŏk đei ‘mi đunh năr, pơm ăn klanh, sơmĕch chêk lar noh roi pơm ăn pơlŏ tŏ lĕch đe roi kơ dêh. Anih juăt jang tŏk bŏk oei hơtŏk lơ trong jang vă tang găn păng hơmet pơlŏ tŏ lĕch đe, hơvơn chă pơlôch klanh, sơmĕch vei sơgaih cham char hơrih xa.