Lơ̆m dêh char Dak Lăk đei 33 hơnih pơlong, hăm hloh 22.500 ‘nu hŏk tro. Hơnih bơ̆ jang pơtho pơhrăm tơring hlôi iung jang hơdoi hăm rim hơnih bơ̆ jang tơlĕch rim trong jang vei lăng sơđơ̆ng, pơjing rơvơn ăn hŏk tro lơ̆m prăt jơ ‘năr pơlong, mă kăl ‘noh hŏk tro tơring atăih yăih dăh mă hŏk tro ŭnh hnam tơnap tap. Tơdrong jang “Vang tơgŭm pơyan pơlong” tơ̆ Dak Lăk đei pơgơ̆r hăm vang iung jang đơ̆ng hloh 1.000 ‘nu hơdruh tơdăm năm jang. Dôm bơngai jang tơgŭm hlôi iung jang lơ̆m rim tơdrong jang nhen: pơtho tơbăt ăn hŏk tro tơchă lăm pơlong, pơm hla bơar năm pơlong; ƀơk ăn đak nhă, tơmam drăm, vei lăng năng tông tơmam drăm ăn hŏk tro; tơgŭm ăn dôm tơmam drăm hŏk pơhrăm ... Atŭm hăm ‘noh, vang vei lăng sơđơ̆ng, sơđơ̆ng trong nơnăm tơ̆ rim hơnih pơlong, trong gre nơnăm. ‘Ngoăih kơ ‘noh, Tơdrong jang ou hlôi chă hơvơn đei hloh 1.500 tơnô̆ sŏng sa đĕch, 50 kơthŭng đak toh rơmo, mơjĭt rơbou get đak pôk ăn rim hŏk tro; păng pơjing kon jên mong vă pôk ăn 4 tơnô̆ jên hŏk pơhrăm “Vang tơgŭm djru pơyan pơlong” kơjă kơjên 2 triu hlak jên lơ̆m 1 tơnô̆ tơgŭm ăn rim đe oh ŭnh hnam tơnap tap.

Dêh char Kon Tum đei hloh 5.300 ‘nu hŏk tro vang pơlong tôt ngiêp jăl 3. Lơ̆m dêh char hơmet ăn 14 hơnih pơlong hăm 244 lăm pơlong păng 28 lăm gô. ‘Ngoăih kơ ‘noh, anih vei lăng pơtho pơhrăm păng khŭl kơdră chĕp kơ̆l rim tơring kŭm hlôi hơmet ăn dơ̆ng 9 hơnih pơlong hơmet hiă mưh đei ƀôh ‘mi kial pơrăm. Vă vei sơđơ̆ng ‘măng pơlong tôt ngiêp jăl 3 pơgơ̆r sơđơ̆ng, tơpăt, ƀlep tơdrong pơkăp, dêh char Kon Tum hơvơn đei hloh 1.200 kang ƀô̆, bơngai jang teh đak bơ̆jang vei lăng pơlong. Dôm tơring lơ̆m dêh char hlôi hơvơn đei hloh 600 triệu hlak jên tơgŭm hloh 1.800 ‘nu hŏk tro đei hơrih sa pơmat tat. Hơdai hăm ‘noh, dôm hnam trưng kŭm hlôi hơmet ăn ‘lơ̆ng hơnih oei sa ăn kơ hŏk tro bơngai kon kông hơtăih kơ hơnih pơlong.

Sơnăm ou, dêh char Gia Lai đei hloh 16.200 ‘nu hŏk tro năm pơlong. Lơ̆m dêh char hơmet ăn 42 hơnih pơlong hăm 718 lăm pơlong.  Gia Lai hlôi hơvơn 4.500 ‘nu kang ƀô̆, ƀok thây kô, bơngai bơ̆ jang vang năm lăng pơlong. Tơdrong jang “Vang tơgŭm pơyan pơlong” tơ̆ rim tơring hlôi hơmet đang ‘lơ̆ng tơ̆ rim hơnih pơlong.  2.400 ‘nu hŏk tro tơnap tap lơ̆m dêh char hlôi đei tơgŭm ăn hăm akŏp kon jên hloh 940 triu hlak jên. Hơdrô̆ pơlei tơm Pleiku đei hơmet ăn hơnih oei sa, pơdơ̆h pơdei ăn hŏk tro. 

Lơ̆m dêh char Đắk Nông đei hlŏh 8.500 ‘nu hŏk tro chih măt vang pơlong tốt nghiệp jăl 3. Dêh char pơm 23 anih pơlong tơpă, hăm 380 lăm pơlong, đei klăih song dôm ăi tơ̆ dôm apŭng, pơlei tơm vă pơjing tơdrong hiôk hian mưh chă yak vih vât ăn đe hŏk tro, mă loi ‘nŏh tơ̆ tơring hơtăih yăih.  

‘Măng pơlong sơnăm ou, dêh char Lâm Đồng đei vă jê̆ 17.000 ‘nu hŏk tro năm pơlong. Dêh char hơmet ăn 40 hơnih pơlong hăm đei 719 lăm pơlong. Akŏp măt bơngai vang lăng pơlong ‘noh hloh 2.500 ‘nu bơngai. Hăm tơdrong hơmet ‘lơ̆ng khul jang, hơnih pơlong, atŭm hăm vang iung jang kơjăp ƀar păh Hơnih vei lăng hnam trương pơtho pơhrăm hăm rim hơnih bơ̆ jang, dêh char Lâm Đồng kơrŭn jơhngơ̆m pơgơ̆r pơlong sơđơ̆ng, tơpăt, ƀlep hăm trong tơchơ̆t păng iŏk đei jơnei kơtang hloh.