Ƀar păh drơ̆ng nơ̆r pơm hơtŏk dôm tơdrong hlôi jang đei, lơ̆m nŏh pơma hơdăh: Tơdrong jang hơdoi đơ̆ng Anih chĕp kơ̆l pơgơ̆r Ƀô đô̆i vei lăng tơring sơlam Việt Nam păng Anih vei lăng tơdrong mât oei xa Campuchia vang tơgop vei kơjăp tơdrong sơđơ̆ng, pơjing tơdrong ‘lơ̆ng ăn tơdrong yak vih vât tơ̆ tơring sơlam kiơ̆ đơ̆ng dôm ‘măng jang sơlam, vang tơgop pơm atŏk tơ-iung tơdrong jang mŭk drăm, tơpôl, hơtŏk tơdrong tơguăt 1 ƀơ̆r đon, jang tơbôl, hlôh vao băl đơ̆ng khul kơdră pơgơ̆r, kon pơlei păng khul linh vei lăng tơring sơlam kơ 2 tĕh đak.

Tơ̆ jơ pơma đam, Trung tướng Lê Đức Thái, Yŏng chĕp kơ̆l pơgơ̆r khul linh Ƀô đô̆i vei lăng tơring sơlam Việt Nam bơnê kơ Anih vei lăng tơdrong mât oei xa, Anih tơm jang Nô̆i vŭ tĕh đak Campuchia vang jang hơdoi, dŏng tơgŭm dôm bơngai răm ‘nŏh jĭ bơngai Việt Nam put kiơ̆ nơ̆r pơhlŭ đơ̆ng bơngai kơnê̆, kơdâu mât glăi luơ̆t păng đei đe rôp pơgŏ bơ̆ jang tơ̆ dôm anih jang xa glăi luơ̆t tơ̆ Campuchia. Tơ̆ hơnăp kơnh, 2 păh vă hơnơ̆ng jang hơdoi mă ‘lơ̆ng lơ̆m tơdrong tang găn bơngai mât lĕch glăi luơ̆t, tơtom roi tơbăt ăn băl, phă đei dôm khul tĕch bơngai, anih pơgŏ đe jang, vă găn đĭ, sek tơlang tôch tơdrong ‘nâu.