Lêh roi tơbăt hơdăh dôm anih mơdro sa Kơjăp tơ̆ Việt Nam 2024 hăm hơnăn “Anih mơdro sa jang tŏk lơ̆m Chăl jang mŭk drăm rơgoh ‘lơ̆ng” đei Jơnŭm Anih mơdro sa yua kơ tơdrong hơtŏk tơiung kơjăp Việt Nam găh Liên đoàn Tĕch mơdro păng Kơmăy kơmŏk Việt Nam (VCCI) pơgơ̆r gơmăng ‘năr 29/11 tơ̆ Hà Nội. Tơ̆ tơdrong jang 100 anih mơdro sa kơjăp ‘lơ̆ng tơ̆ pơđĭ tơdrong jang pơm tơlĕch păng tĕch mơdro - pơvih pơvăn đei pôk hơnăn. Pơma tơ̆ lêh roi tơbăt, Kơdră VCCI, Kơdră Anih pơgơ̆r jang tơdrong jang tĕch mơdro kơjăp tơ̆ Việt Nam (CSI) Phạm Tấn Công roi tơbăt, pơtôch dăr hơlen đơ̆ng VCCI hăm dôm anih mơdro sa iŏk đei hơnăn jang kơjăp đơ̆ng Tơdrong jang CSI lơ̆m vă jê̆ jĭt sơnăm âu ki hlôi tơƀôh hơdăh, dôm anih mơdro sa hơdrin jang kiơ̆ tơdrong jang pơm tơlĕch tĕch mơdro, kơjăp, pơm lăp hăm dôm long nol păng băt hơdăh dôm tơdrong hiôk tŏk bŏk đei pơih să đơ̆ng tơdrong tơplih rơgoh, tơplih kơsô̆ đơ̆ng anih mơdro sa.

Sơnăm ‘nâu tơdrong jang sơng đei vă jê̆ 500 anih mơdro sa lơ̆m teh đak, bơ̆jang tơ̆ đĭ đăng rim tơdrong jang. Tơ̆ lêh roi tơbăt hơdăh, Khŭl pơgơ̆r jang Tơdrong jang pôk pơ ư păng pôk hơnăn 100 anih mơdro sa kơjăp ‘lơ̆ng tơ̆ đĭ đăng tơdrong jang pơm tơlĕch păng tĕch mơdro - pơvih pơvăn. Lơ̆m noh, Grŭp 10 anih mơdro sa kơjăp iŏk kơsô̆ 50% anih mơdro sa lơ̆m teh đak păng 50% anih mơdro sa đei jên tơmơ̆t jang đơ̆ng teh đak đe.