Truh dang ei, dêh char Đắk Nông ‘nao tơlĕch jên jang tam mă đei 50% akŏp kơsô̆ jên tơmơ̆t jang teh đak đei pơjao sơnăm 2024. Pơtho tơtă tŭn pran tơdrong jang, Kơdră Anih vei lăng kon pơlei dêh char Đắk Nông hlôi athei pơgơ̆r tơlĕch trong hơlen lăng kơtă tơ̆ dôm tơdrong jang đei kơsô̆ tơlĕch jên jang iŏk đei tŏ sĕt. Kiơ̆ trong tơlĕch jang, lơ̆m giĕng truh, Anih vei lăng kon pơlei dêh char Đắk Nông gô pơgơ̆r 2 khŭl hơlen lăng, yua đơ̆ng kơdră păng phŏ kơdră chĕp kơ̆l 2 khŭl, kơtă năm hơlen lăng 11 tơdrong jang tơ̆ dôm apŭng Đắk Mil, Cư Jút, Đắk R’lấp, Krông Nô păng pơlei tơm Gia Nghĩa.

‘Nâu jĭ dôm tơdrong jang tơmơ̆t jên jang teh đak lơ̆m tơdrong jang pơm trong nơnăm, dơnâu mong đak, đei tơdrong ‘lơ̆ng gĭt kăl hăm tơdrong hơtŏk tơiung mŭk drăm tơ pôl kơ tơring, mă lei tơdrong bơ̆jang kiơ̆ hiơ̆ hyĭn, kơsô̆ tơlĕch jên jang tŏ sĕt.