Jơnŭm jang Trung ương hlôi hơtŏk pran tơdrong jang tơroi tơbăt gah tơdrong jang 8 kiơ̆ dôm tơdrong pơma đam lơ̆m kênh tơroi tơbăt tơpôl. Jang hadoi hăm dôm anih jang tơm, anih jang đei tơrĕk pơm jang dôm tơdrong tơchơ̆t kơ tơdrong jang 8 tơrĕk truh sơnong jang kơ anih jang.

Atŭm hăm dôm tơdrong jang tơgŭm đơ̆ng Jơnŭm jang tơ̆ Trung ương, Jơnŭm jang gah drŏkăn dôm jăl jang tơ̆ tơring adoi akŏm tơlĕch pơm jang tơ̆ 8 xah pơkăp tơm, hlôi pơjing đei păng pơtoi pơm jang đei 32 khul jang tơroi tơbăt tơ̆ tơring, 4 Anih lui ngeh, 4 Kâu lak ƀô̆ dơnơm kơ tơdrong tơplih păng pơgơ̆r đei 4 ‘măng pơma đam gah pơkăp jang. Tơrĕk, pơgơ̆r pơhrăm hơtŏk jang hơbĕch hơbal ăn kan ƀô̆ drŏkăn kon kông. Pơhrăm, pơtho, hơlen, sơkơ̆t gah hơtŏ hơnơ̆ng drŏnglo drŏkăn, hơtŏk tơdrong pơm jang hadoi ăn kan ƀô̆ apŭng, xah păng thôn pơlei.  

Kiơ̆ kơ yă Trần Lan Phương, Phŏ Kơdră Jơnŭm jang Drŏkăn Việt Nam, đơ̆ng rŏng 3 sơnăm tơlĕch dôm tơdrong jang tơroi tơbăt, hơtŏk tơdrong jang ăn kan ƀô̆ drăkăn kon kông, hơtŏk tơdrong jang hadoi ăn kan ƀô̆ lơ̆m anih jang chĭnh trĭ, đe kră pơlei, kơdră pơlei, bơngai đei kon pơlei lui yom lơ̆m pơlei pơla păng pơgơ̆r pơma đam gah tơchơ̆t jang tơ̆ xah păng thôn pơlei hlôi đei dôm anih jang păng Jơnŭm jang Drŏkăn dôm dêh char tơlĕch jang atŭm tơgŭm tơ̆ xah pơkăp jang: Dôm tơdrong pơgơ̆r jang mă blŭng pơjing đei tơdrong tơplih lơ̆m đon tơchĕng, trong pơm jang kơ kon pơlei, tơgop pơm tơplih trong tơchĕng, sut lê̆ tơklah chere oei xa drŏnglo hăm drŏkăn păng tơjur ƀiơ̆ tơdrong răm đơ̆ng dôm tơdrong jang hăm đe drŏkăn păng đe hơ-ioh.

Yă Lò Thị Thu Thủy, jang lơ̆m Khul Kơdră, Kơdră Anih jang Kon kông – Tơdrong khop, Trung ương Jơnŭm jang gah Drŏkăn Việt Nam ăn tơbăt: dôm anih jang kơ Trung ương hlôi chih akŏm đei hla bar pơtho pơjing, iŏk jang păng hla bar ‘măn ăn tơdrong tơroi tơbăt, pơgơ̆r akŏm kiơ̆ dôm tơdrong pơkăp. Mă kăl noh dôm Kâu lak ƀô̆ "Kơdră kơ tơdrong tơplih". Pơm video pơdah, lăng ƀôh kơtă đang măt trŏ hăm rim bơngai:  Kiơ̆ đơ̆ng pơhrăm, pơtho hơtŏk tơdrong jang ăn kan ƀô̆ Jơnŭm jang păng kan ƀô̆ kơ dôm anih jang đei tơrĕk tơ̆ xah gah pơjing, iŏk yua păng hơtŏk tơdrong jang hlôi đei dôm Jơnŭm jang tơ̆ Trung ương tơrĕk truh pơm jang hơnơ̆ng rim sơnăm. Atŭm hăm noh hơtŏk tơgŭm kih thuơ̆t ăn tơring kơtă vei lăng iŏk jang kiơ̆ pơkăp. Pơgơ̆r akŏm tơroi tơbăt pơtơm tơ̆ pơlei pơla.

Kiơ̆ tơroi đơ̆ng Anih jang Kon kông – Tơdrong khop, Trung ương Jơnŭm jang gah Drŏkăn Việt Nam, dôm tơdrong jang kơ dôm Jơnŭm jang tơ̆ dôm xah pơkăp hlôi akŏm lơ̆m tơdrong tơroi tơbăt tơm vă tơplih đon tơchĕng, trong pơm jang, sut lê̆ tơdrong oei xa chere drŏnglo hăm drŏkăn. Kiơ̆ tơdrong pơtho đơ̆ng Trung ương, jơnŭm jang dôm jăl jang hlôi hơvơn đei tơdrong vang jang đơ̆ng dôm anih jang, dôm jăl jang tơlĕch dôm tơdrong pơm jang đei jơnei tơnăp.