'Nâu jĭ kơtơ̆ng ang đei tơbang ah Hop akŏm sơkơ̆t Tơdrong jang kơsô̆ 64 sơnăm 2018 đơ̆ng Anih jang Tĭnh uy Gia Lai, pơgơ̆r ah pơgê năr 29/11. Tơroi ah hop akŏm ăn ƀôh, đơ̆ng sơnăm 2015 truh dang ei, Gia Lai hlôi hăt hot hơlen tơmơ̆t hadoi păng tơklah dôm anih jang kŏng lơ̆p mă pơm jang ưh đei tơnăp dah mă đei sơnong jang le lăi băl. Đơ̆ng noh, dêh char hlôi tơjur 189 anih jang kŏng lơ̆p, hơtŏ hăm 17,5%. Truh hơtuch khei 6/2024, jơ̆p dêh char oei 891 anih jang kŏng lơ̆p.

Gah tơdrong jang pơtho pơhrăm đei lơ kơsô̆ hloh lơ̆m tơdrong jang kŏng lơ̆p – dêh char hlôi tơjur 86 hnam trưng mâm non păng phôh thŏng, atŭm 406 hnam trưng nai. Gah jang pơgang hơmet Jĭ jăn, dêh char pơkăp anih jang pơgang hơmet jĭ jăn tơ̆ apŭng jing anih pơkăp lơ tơdrong jang, tơjur 24 anih. Rim anih jang joh ayŏ, tơplŏng kơdâu adoi đei pơkăp mă bot, tơjur hloh 39% anih jang tơ̆ apŭng. Hăm pơkăp jang tơnăp dôm tơdrong tơchơ̆t đơ̆ng Trung ương, Gia Lai hlôi keh đang gah tơchơ̆t dôm tơdrong jang gah pơkăp sơnong jang tơ̆ dôm anih jang kŏng lơ̆p lơ̆m sơnăm 2023, pơm trong ăn tơdrong tơjur ƀiên chê̆ păng sơkơ̆t jơnŭm jang hanh chĭn. Dêh char adoi oei hơlen dôm trong jang vă hơtŏk pran tơdrong pơkăp păng tơplih 'nao jơnŭm jang, vei sơđơ̆ng pơm jang tơnăp ưh đei răm truh tơdrong jang kŏng.