Sơng pơma dơnuh hăm Ƀok Pơtao teh đak Campuchia Norodom Sihamoni đei Ƀok hòa thượng Thích Thiện Nhơn, Kơdră chĕp kơ̆l jơnŭm pơgơ̆r Trung ương Khŭl lui Phât Việt Nam- Vei lăng hnam chùa Quán Sứ. Đơ̆ng rŏng kơ soh nhang tơ̆ hơnih soi hnam chùa Quán Sứ, Ƀok Pơtao teh đak Campuchia pơma dơnuh hăm đe ƀok phât tơ̆ hnam chùa. 2 păh vang lăng dơ̆ng dôm khei ‘năr jơhnơr hơrih ang hơdăh, ling lang hơdai đơ̆ng Khŭl lui Phât Việt Nam păng Khŭl lui Phât Campuchia, tơgop tơgŭm kon pơlei 2 teh đak yak hloh mơmat tat.

Ƀok hòa thượng Thích Thiện Nhơn tơƀôh jơhngơ̆m đon hơiă, ‘măng năm ngôi âu đơ̆ng Ƀok Pơtao teh đak Campuchia jĭ tơdrong gĭt kăl, tơƀôh hơdăh hơnăp jang đơ̆ng Khŭl lui Phât Campuchia păng Khŭl lui Phât Việt Nam lơ̆m tơdrong tơgop pơtrŭt hơtŏk hloh dơ̆ng tơdrong pơvei băl đơ̆ng teh đak tơ jê̆, tơƀôh hơdăh tơdrong pôm nơ̆r ƀơ̆r đon tơbôl ‘lơ̆ng hơiă joăt joe đơ̆ng kon pơlei 2 teh đak.