Tơroi tơbăt ăn Ƀok pơtao găh hơnih Văn Miếu - Quốc Tử Giám, Kơdră chĕp pơgơ̆r Teh đak Lương Cường tơbăt ‘nou jĭ hơnih tơbăt ăn Hơnih tơm Hà Nội rơbou sơnăm tơgop tih tên, jĭ hnam trương đăi hŏk mă blŭng kơ Việt Nam, hơnih đei 82 tŏ tơmo chih tơbăt Tiến sĩ đei UNESCO drơ̆ng nơ̆r ‘noh Mŭk drăm gĭt kăl dăr sơnăm apung plĕnh teh lơ̆m plei teh. Vang chă huch ngôi đak hla che, Kơdră chĕp pơgơ̆r Teh đak tơbăt jơhngơ̆m đon chơt hơ iă ƀôh akhan lơ̆m khei năr ou ki tơgoăt tơgoăl ƀar teh đak hơnơ̆ng atŏk tơ iung sơđơ̆ng; lui yom dih băl kơtang, tơklep dih băl kơjăp ƀar păh Kơdră chĕp pơgơ̆r păng kon pơlei ƀar teh đak roi năr roi đei hơmet pơ ‘lơ̆ng. Kơdră chĕp pơgơ̆r Teh đak lui akhan, hăm kơchư̆k jang đơ̆ng kơdih, Ƀok pơtao gô hơnơ̆ng hơmet pơ ‘lơ̆ng ăn tơgoăt tơgoăl dih băl ‘lơ̆ng hơ iă hloh dơ̆ng, adoi lăng ba kơjăp tơgŭm djru lơ̆m pơrô̆ pơrôp, pơtho tơbăt kơtang ăn rim răih kon pơlei, mă kăl hăm jơhnơr mơlôh băt hlôh ƀôh hơdăh găh tơdrong tơgoăt tơgoăl dih băl kơjăp ‘lơ̆ng, plang ăn dih băl kơ ƀar teh đak, ƀar hơdrĕch hơdrung păng hơnơ̆ng atŏk kơtang tơgoăl tơgoăt ‘lơ̆ng hơ iă Việt Nam - Campuchia.