Tơ lĕch jang drơ̆ng nơ̆r jang hơdai hơtŏk tơiung mŭk drăm - tơpôl đơ̆ng dôm dêh char tơring Tây Nguyên păng pơlei tơm Hồ Chí Minh, ‘năr 29/11, tơ̆ pơlei tơm Kon Tum, Anih vei lăng kon pơlei dêh char Kon Tum păng Khŭl vei lăng Hơnih choh jang sa păng kơmăy kơmŏk ‘nao pơlei tơm Hồ Chí Minh jang hơdai pơgơ̆r Hop akŏm khoa hŏk “Tơplih kơsô̆ lơ̆m choh jang sa, tơdrong hiôk tơgoăt hơdai kơmăy kơmŏk đơ̆ng Tây Nguyên păng pơlei tơm Hồ Chí Minh”. Hop akŏm đei tơdrong vang akŏm đơ̆ng 150 ‘nu bơngai tang măt. Roi tơbăt tơ̆ hop akŏm, tơplih kơsô̆ lơ̆m choh jang sa tơ̆ Tây Nguyên oei jing 1 tơdrong jang ‘nao, tơ jră hăm lơ long nol, mă loi ‘noh jĭ găh anih jang kơmăy kơmŏk păng tơdrong gơh yua kơmăy kơmŏk đơ̆ng kon pơlei jang chŭn mir.

Tơdrong tơlĕch jang tơplih kơsô̆ pơkă hơnhăk ăn dôm tơdrong tơplih ‘lơ̆ng, tơgŭm dôm dêh char Tây Nguyên ưh khan lăp hơtŏk tơiung pran kơtang mă oei hơtŏk tơiung kơjăp hloh. Dôm bơngai vei lăng, joăt jang, bơngai jang khoa hŏk, bơngai jang mơdro sa păng rim bơngai hlôi vang pơma dơnuh, tơlĕch ăn trong jang tơgop pơtrŭt tơdrong jang tơplih kơsô̆ lơ̆m tơdrong jang choh jang sa lơ̆m tơring; tŭn pran iŏk yua khoa hŏk kơmăy kơmŏk lơ̆m pơm tơlĕch choh jang sa; hơtŏk loi dơ̆ng tơdrong hiôk jang hơdai, tơgoăt anih tĕch mơdro khoa hŏk păng kơmăy kơmŏk, tơmam đơ̆ng dôm dêh char Tây Nguyên păng pơlei tơm Hồ Chí Minh. 9 nơ̆r pơma dơnuh kơtă, 24 nơ̆r pơma dơnuh gơih truh hop akŏm đơ̆ng dôm bơngai vei lăng, joăt jang, bơngai jang khoa hŏk, bơngai mơdro sa păng rim bơngai kŭm hlôi tơblang hơdăh tơdrong tơplih kơsô̆ tơdrong jang choh jang sa dôm dêh char lơ̆m tơring Tây Nguyên; pơih ăn dôm tơdrong kăl jang hơdai pơtrŭt tơplih kơsô̆ păng hơtŏk tơiung choh jang sa kơjăp đơ̆ng dôm dêh char tơring Tây Nguyên hăm pơlei tơm Hồ Chí Minh; roi tơƀôh găh iŏk yua kơmăy kơmŏk ‘nao lơ̆m tơdrong jang choh jang sa.