Tơ̆ jơ bơ̆ jang, đe kơdră kơ dôm anih jang kơ Rađiô nơ̆r pơma VN tơroi kơ dôm tơdrong jang tơroi tơbăt kơ VOV, dôm tơdrong tơnap tap lơ̆m tơdrong pơkăp kơdih vei lăng păng axong jên hu kơ VOV kiơ̆ Tơchơ̆t 60 kơ Jơnŭm pơgơ̆r teh đak; tơnap tap lơ̆m jơnŭm pơgơ̆r jang ăh mă athei tơjur ƀiên chê̆ kiơ̆ tơchơ̆t tơlĕch; pơkăp chih măt kơ anih jang ƀăo chĭ lơ̆m khei năr dang ei, ăh jên mong roi năr roi kăt tơjur noh tơdrong erih đe kang ƀô̆ bơngai jang roi năr roi tơnap tap. Atŭm hăm noh, tơlĕch dôm trong jang pơklaih tơnap tap lơ̆m khei năr truh. Rim bơngai jang lơ̆m Anih jang Joh ayŏ Pơtho Pơhrăm kơ Kuôk hô̆i xơkơ̆t: VOV jing minh lơ̆m 6 anih jang ƀăo chĭ dơnơm kơ teh đak bơ̆n, dang ei oei tơjră hăm lơ tơdrong tơnap tap, tơdrong tơgar găh trong jang tơroi tơbăt, tơplih tơrĕk truh trong pơgơ̆r jang. Mă kăl noh dôm tơdrong tơnap tap găh trong pơkăp jang kơ teh đak.  Anih jang Joh ayŏ Pơtho Pơhrăm kơ Kuôk hô̆i gô jang atŭm hăm VOV tơlĕch dôm trong pơkăp jang, mă kăl noh pơkăp lơ̆m Luơ̆t ƀăo chĭ (hơmet tơplih) truh âu kơnh vă xơkơ̆t anih dơ̆ng kơ dôm anih jang ƀăo chĭ dơnơm hăm luơ̆t.