Tang măt ăn jơnŭm pơgơ̆r Đảng, Teh đak kŭp yom pôk ăn kơ ƀok Trần Quốc Vượng Mê đai 45 sơnăm jang Đảng, Ƀok Tổng Bí thư Tô  Lâm thơ thâu hơ-iă hăm ƀok Trần Quốc Vượng păng đe ƀok đei pôk Mê đai 40 sơnăm, 30 sơnăm jang Đảng, ră hơdah, đe ƀok đei pôk mê đai đảng 'năr âu hlôi đei tơdrong jang đunh đai tơ̆ lơ anih jang, lơ̆m tơdrong pơm jang, đe ƀok hơnơ̆ng vei kơjăp đon bơnôh kăch mạng kơ bơngai kŏng san, pơm kiơ̆ tơnăp sơnong jang đei pơjao.

Hăm kơdih po ƀok Trần Quốc Vượng hăm rim tơdrong jang, ƀok hơnơ̆ng keh đang tơnăp sơnong jang đei pơjao, tơgop kăp gĭt lơ̆m tơdrong jang vei lăng chĭnh trĭ khôi luơ̆t adoi nhen pơm jang đei jơnei dôm sơnong jang chĭnh trĭ kơ Đảng, đei lơ tơgop tih tên lơ̆m tơdrong jang tang găn păng tơjră pơm kơnê̆, tơgop hơtŏk đon lui đơ̆ng kan ƀô̆ Đảng viên păng tôm kon pơlei hăm Đảng.