Lăng ‘lơ̆ng Hla ar roi tơbăt pơtôch găh tơdrong jang pơjing Đảng, tơdrong jang chĭnh trĭ, hơtŏk tơiung mŭk drăm - tơpôl, vei sơđơ̆ng teh đak, jang tơbôl đơ̆ng pơlei tơm, Tổng Bí thư Tô Lâm roi tơbăt Trung ương băt hơdăh Hà Nội jĭ Đảng bộ tơm, đảng bộ pơm jŭk yŭk trong hơlâu, ‘meh vă pơlei tơm gô hơdrin tơlĕch jang dôm tơdrong tơchơ̆t đơ̆ng Đảng vă jăh yak mơ̆t lơ̆m tơdrong hơrih sa, truh hăm kơdră tơring, rim kang ƀô̆, đảng viên.

Hơdai hăm ‘meh vă Hà Nội jing tơring jang mŭk drăm tŏk kơ tơring păng lơ̆m teh đak, chơng ba jang tŏk ăn dôm dêh char jum dăr, Tổng Bí thư athei Hà Nội jing hơnih tơm kơ tơplih ‘nao pơcheh hơgei. Găh hơnăp jang ƀơ̆t măt, Tổng Bí thư Tô Lâm athei Hà Nội kăl kơ akŏm bơ̆jang kiơ̆ ‘lơ̆ng tơdrong Tơchơ̆t 35 đơ̆ng Anih tơm Chĭnh trĭ găh hop akŏm đảng bộ rim tơring yak truh Hop akŏm Bơngai tang măt lơ̆m teh đak ‘măng mă 14 kơ Đảng kiơ̆ ƀlep trong tơlĕch jang.