Tơ̆ pơma đam, ƀar păh pơma tơbăt jơhngơ̆m đon chơt hơ iă găh tơdrong tơgoăt git kăl, tơgoăt tơgoăl kơjăp păng jang hơdoi tôm tong Việt Nam - Lào roi năr roi kơtang, hơnhăk đei iŏk yua kơjăp ăn kon pơlei ƀar teh đak; hôn bơnê kơtang jang hơdoi kơjăp, jơnei ƀar păh Hơnih bơ̆ jang tơbôl khei năr ou ki. Găh trong jang khei năr truh ou kơnh, ƀar păh drơ̆ng mĭnh nơ̆r hơnơ̆ng hơmet ăn ‘lơ̆ng ‘măng tơƀơ̆p kơdră kơpal pêng teh đak Việt Nam-Lào-Campuchia, ‘Măng hop akom mă 47 Hơnih bơ̆ jang Khul kơdră ƀar teh đak păng ‘măng pơma dơnuh chinh trĭ Kơdră jang tơbôl Việt Nam - Lào ‘măng mă 11. Kơ iĕng Thủ tướng, Kơdră jang tơbôl Bùi Thanh Sơn athei ƀar păh hơnơ̆ng iung jang hơdoi kơjăp păng tơgŭm djru dih băl tơ̆ rim ‘măng hop akŏm apŭng plĕnh teh păng tơring; atŏk kơtang tơbăt dih băl trong iung jang găh rim tơdrong apŭng plĕnh teh păng tơring vang lăng truh.