Adrol kơ noh, tơ̆ 'măng hop akŏm mă 4, Kuôk hô̆i jăl 15, lơ bơngai tang măt drơ̆ng nơ̆r hăm tơdrong gĭt kăl tơlĕch iŏk yua Luơ̆t Vei lăng kon pơlei. Atŭm hăm noh, lơ nơ̆r tơgop đơ̆ng bơngai tang măt pơkăl pơtoi hơlen dôm jăl vei lăng kon pơlei vă vei xơđơ̆ng tơdrong gơh jang. Kiơ̆ kơ noh, ăh jăl 1 đei iŏk yua vă tơjră, hơmet tơdrong răm, đei ƀôh lơ̆m tơring teh kơ apŭng, ăh jăl 2 lơ̆m tơring teh kơ dêh char. Tơchơ̆t jăl vei lăng kon pơlei jing tơdrong tơm vă tơchơ̆t tơlĕch, xut hŭt păng dôm trong jang đei iŏk yua lơ̆m rim jăl vei lăng kon pơlei. Adoi lơ̆m 'năr âu, Anih Juăt jang kơpal kơ Kuôk hô̆i xơkơ̆t 'măng hop akŏm ưh đei pơkăp 'măng mă 2 păng mă 3, Kuôk hô̆i jăl 15; Hơlen tơdrong chih akŏm Tơchơ̆t găh xơnong jang păng tơdrong pơgơ̆r đơ̆ng Jơnŭm thư kĭ păng hơlen tơbang tơdrong jang kiơ̆ hơpơi 'moih đơ̆ng kon pơlei kơ Kuôk hô̆i ăh khei 12/2022 păng khei 1/2023.