3 khei âu ki, mă đơ̆ng mŏ Nguyễn Thị Bích Thủy, Phŏ Kơdră chĕp kơ̆l Công ty TNHH Biofresh tơ̆ plt Đà Lạt hơnơ̆ng chă bơngai jang, pơma nuh hăm Anih roi tơƀôh tơdrong jang kơ dêh char Lâm Đồng vă chă bơngai jang mă lăp mă lei oei ưh đei yă kiơ.

Kiơ̆ ƀok Hoàng Trọng Vinh, Kơdră Anih roi tơƀôh tơdrong jang dêh char Lâm Đồng, dang ei lơ̆m dêh char đei 780 anih tĕch mơdro oei ‘mĕh chă bơngai jang, hăm hlŏh 1.000 ‘nu bơngai jang găh lơ tơdrong nhen: pơvih pơvăn, chă tơmang lăng, choh jang xa, chơchoh hơbăn ao... Đei lơ anih jang âu tơlĕch jên khei tôch sơđơ̆ng păng đei trong tơgŭm tôch hơ-iă mă lei chă bơngai jang oei tôch mơmat đĕch, mă loi jĭ dôm bơngai jang hơgei nhen ki sư choh jang xa, vei lăng pơvih pơvăn, jang kơmăy kơmŏk.