Đei tơdrong lei lăi dih băl lơm 2 ‘măng gre hơlŭk lơ̆m gơmăng năr 12 păng 14/2 au ki tơ̆ trong glung Hồ Chí Minh, jăl trong găn hloh apŭng Đak Glei păng trong glung 40B, jăl trong găn hloh apŭng Đak Tô, dêh char Kon Tum, ‘nŏh: pơđĭ ƀar ‘măng gre hơlŭk jei hơlŭk ngăl pơm ăn 3 ‘nu bơntgai lôch, 4 ‘nu bơngai jĭ; Pơđĭ ƀar ‘nu bơngai vơ̆r gre jei đơ̆ng dêh char anai, mĭnh ‘nu bơngai oei tơ̆ dêh char Thanh Hoá păng mĭnh ‘nu oei tơ̆ dêh char Long An. Atŭm hăm tơdrong tim mă joăt kơ trong, kiơ̆ đơ̆ng Thượng tá Nguyễn Xuân Hướng, Kơ iĕng kơdră Hơnih bơ̆ jang Kanh sat vei lăng trong gre, Kŏng ang dêh char Kon Tum, bơngai hlôi lơ sơnăm dăr lăng hơlen, hơmet pơ ‘lơ̆ng lơ ‘măng gre hơlŭk tơtơ̆m kơtang lơ̆m dêh char Kon Tum ‘noh tơdrong ưh kơchăng ‘nŏh jing tơdrong tơm pơm ăn truh ‘măng sar bar gre hơtŭk tơtơ̆m:“Nhôn ƀôh, găh lơ kơ yuơ bơngai vơ̆r gre ưh kơchăng mă pơm ăn đei tơdrong sar bar. Mă blŭng ‘nŏh vơ̆r rĕnh. Mă ƀar ‘nŏh hăt hot. Đei jăl trong mư̆h lơ gre druh kiơ̆ dih băl đơ̆ng rŏng ‘nŏh đei bơngai vơ̆r hăt hot vă jăh truh kơna ploi gre nai, mă lei mưh truh trong koĕl, trong iĕ, đei gre yak đơ̆ng păh to kơna ưh kơ tom veh dih băl pơm ăn truh đei tơdrong tơtơ̆m, hơlŭk hloi”.

Jei kiơ̆ đơ̆ng Thượng tá Nguyễn Xuân Hướng tơ̆ rim jăl trong glung găn hloh dêh char Kon Tum đei lơ jăl trong krông krang hang nak, trong koĕt koĕl tôch hơmơt tơt, bơngai vơ̆r gre kăl kơchăng mă brĕ ‘noh: Krông krang Lò Xo, tơ̆ trong glung Hồ Chí Minh; krông krang Văng Rơi, tơ̆ trong glung 40B; krông krang Măng Đen, krông krang Vi ô lắc tơ̆ trong glung 24; krông krang Ngọc Vin tơ̆ trong glung 14C… Thượng tá Nguyễn Xuân Hướng tơbăt, tơ̆ hơnăp roi năr roi lơ gre hơlŭk, tơtơ̆m tơ̆ rim jăl trong glung lơ̆m dêh char dôm năr tơjê̆ au, khul kanh sat vei lăng trong gre nơnăm hlôi iung jang kơtang chă pơtho tơbăt ăn rim bơngai vơ̆r gre:“Rim bơngai vơ̆r gre tih, gre chơ tơmoi, mă kăl hăm dôm gre chơ trăp hơdrol tơdruh krông krang dăh mă tŏk soăn ‘nŏh kăl pơdơh hơdrol ‘mơ̆i, chă lăng hơlen bơ̆n phen gre, ‘long vơr, pơm ăn kơ lôp gre rơngơp ‘mơi. Mưh vơ̆r jur trong krông krang kăl lăng hơlen kơƀang tơbăt găh trong nơnăm. Bơngai vơ̆r gre kăl tăh kơsô̆ mĭnh vă gre kơdau ngơ ngê̆ păng chă jô̆ phen ƀônh kơ kăp”.

Ƀok Khuất Việt Hùng, Kơ iĕng Kơdră chĕp pơgơ̆r Hơnih vei lăng Sơđơ̆ng Trong nơnăm teh đak tơbăt, tơ̆ dêh char Kon Tum pơma hơdrô̆ păng tơring Tây Nguyên pơma atŭm, tơdrong pơm glăi khôi luơ̆t găh sơđơ̆ng trong nơnăm, nhen gre chơ hloh tơdrong pơkăp, kon pơlei hao gre bơbĭt ưh kơ yơ̆l môk kŭp, đĭ et tơdrô hơlăk mă lei oei vơ̆r gre yak tơ̆ trong ... oei ƀôh hơnơ̆ng đĕch. Tơ̆ rim jăl trong nơnăm lơ̆m tơring oei đei lơ hơnih hơmơt pơm ăn truh tơdrong sar bar trong nơnăm tôch kơtang. Kơ yuơ lơ loh, Hơnih vei lăng Sơđơ̆ng trong nơnăm Teh đak păng kơdră tơring, rim hơnih bơ̆ jang rim dêh char kăl hơnơ̆ng atok kơtang bơ̆ jang pơtho tơbăt vă tơplih jơhngơ̆m đon kơchăng păng tơdrong pơm kiơ̆ kơ jăp sơđơ̆ng kơ dôm bơngai vơ̆r gre yak tơ̆ trong nơnăm:“Tơdrong bơ̆n hơnơ̆ng pơgơ̆r pơtho tơbăt dôm tơdrong pơkăp găh sơđơ̆ng trong nơnăm, nhen: mưh đĭ et tơdrô hơlăk ‘nŏh ưh kơ vơ̆r gre, ưh kơ chơ hloh pơkăp, ưh glĕch gloch, ưh hao rĕnh, yơl môk kŭp mă ƀlep muh hrao gre bơbit. Dôm nơ̆r pơkăp jĭ tôch kơ lăp, ƀônh kơchăm. Hlŏh đơ̆ng pơtho tơbăt ‘nŏh rim boăl hơdruh tơdăm, kơdrơ̆m kon pơlei băt hơdăh dôm tơdrong tơchơ̆t kơ khôi luơ̆t, băt hơdăh dôm nơ̆r pơkăp găh sơđơ̆ng trong nơnăm. Hlŏh đơ̆ng noh tơgŭm ăn kon pơlei băt hlôh ƀôh hơdăh, pơm kiơ̆ kơjăp khôi luơ̆t găh sơđơ̆ng trong nơnăm păng tơgŭm ăn sơđơ̆ng dơ̆ng kơjăp trong nơnăm roi năr roi ‘lơ̆ng hơ iă hloh”./.