- Blŭng a, ƀlep ƀât tơbăt 80 sơnăm Năr pơjing Khul linh kon pơlei Việt Nam, apinh thơ thou ăn kơ ƀok Đinh Nan ling lang pran jăng, grăng âu! Apinh ih, roi tơƀôh đon tơchĕng thoi yơ hăm tơdrong gĭt kăl ‘nâu năng?

            -Ƀok Đinh Nan: “Đơ̆ng tơdăm sơ̆, inh ‘moi kiơ̆ Ƀok Hnup jang kăch mang, pơm ƀô đô̆i, kiơ̆ Đảng, Ƀok Hô kŭm hăm Ƀô đô̆i tơblăh ayăt Mi hăm tơdrong pơgơ̆r đơ̆ng Đại Tướng Võ Nguyên Giáp. Inh kŭm hăm khul linh Ƀôi đô̆i tơblăh Mi đơ̆ng xăh Tân Bình truh tơ̆ đeo Mang Yang. Kŭm hăm Ƀô đô̆i tơm tơblăh Ăp, phă trong, linh Mi lôch tôch lơ. Yak hlŏh kơbăt dôm yơ glĕh hrat pơmat tat mă gơh đei tơdrong rơngei nhen hrei ‘nâu.”

            - Iu, hơiă tơpă, mưh ih bou truh kơ Ƀok Hô, bou truh Đại tướng Võ Nguyên Giáp păng Ƀok Hnŭp tơblăh kơtang nuih mơng–Bơngai đei đĭ đăng kon pơlei Tây Nguyên pơma atŭm păng kon pơlei Bahnar pơma hơdrô̆ ‘mêm kơeng. Hăm Đại tướng Võ Nguyên Giáp, đei pơtih jĭ “ ‘Nhŏng kơdră” kơ khul linh kon pơlei Việt Nam, ih đei đon tơchĕng thoi yơ?

            -Ƀok Đinh Nan: “Inh ƀôh tơdrong pơgơ̆r đơ̆ng Đại Tướng Võ Nguyên Giáp tôch gĭt kăl, đơ̆ng tơblăh Phalăng sơ̆ dăh mă truh tơblăh Mi hloi. Đại tướng Võ Nguyên Giáp hơnơ̆ng pơtho tơƀôh: mă mônh athei mât 1 ƀơ̆r đon, ưh gơ̆h che re băl, mă 2 athei mĭnh jơhngâm tơblăh hŭt hơyăt, iŏk rơngei ăn teh đak, hơnhăk ba tơdrong hiôk hian ăn rim bơngai. Teh đak rơngei ‘nŏh kăl hloh kơna nhôn hơnơ̆ng chĕp vei nơ̆r Đại tướng. Gơnơm tơdrong pơgơ̆r gơ̆h hơgei đơ̆ng Đại tướng mă teh đak bơ̆n gơ̆h iŏk đei rơngei, hiôk hian nhen hrei ‘nâu.”

             - Jĭ 1 ‘nu linh vang iung tơblăh iŏk rơngei ăn teh đak, pơlei pơla, ưh jor ih đei lơ tơdrong mă 1 ‘nu bơngai pơm linh oei ƀlŏk hơnơ̆ng lơ̆m chăl tơblăh gleh hrăt, pơmat tat, lôch răm, ơh sơ ‘ngon sơ̆, ưh deh?

              -Ƀok Đinh Nan: “Pơma atŭm chăl tơblăh vang sơ̆ tơdrong lôch rơka đei ngăl, inh ƀôh lơ bôl boăl lôch tang, ơh dêh, mă lei kơsô̆ unh pŭn ƀiơ̆. Mă loi jĭ tơdrong tơblăh Mậu Thân 1968 tôch krưp krĕnh, khul nhôn đei truh 10 ‘nu bơngai lôch, kơdih kâu inh pŭn kơna oei ƀôh tơdrong arih xa ‘lơ̆ng hơiă hrei ‘nâu”.

            - Tơpă mơ̆n, nhen ih ‘nao tơroi, kơ dih kâu ih tôch pŭn kơna oei gơ̆h arih, năng ƀôh tơdrong tơplih ‘nao ‘lơ̆ng rŏ nhen hrei ‘nâu. Mă tơpă, ‘nŏh jĭ tơdrong plang jơhngâm tôch tih đơ̆ng đe linh Ƀok Hô, kơna hơnơ̆ng đei Đảng păng teh đak ƀlŏk truh.

             -Ƀok Đinh Nan: “Tơblăh vang hrang tơƀet sơ̆ inh oei tơdăm, inh ưh hli lôch răm, pơmat tat ôh, inh hơdrin tơblăh, chu hŭt sĕch kar kơna iŏk đei lơ tơdrong jơnei, đei Đảng, Teh đak hơpăh ăn lơ Mê đai kăp gĭt. Mă mĭnh jĭ Mê đai Tơblăh Mi dơ̆ng mă mônh, mă 2 jĭ Mê đai Quyết thắng dơ̆ng mă mônh... Inh kŭm chơt hơiă đei mât Đảng sơnăm 1968, mât tơpă sơnăm 1969, inh oei đei Đảng, teh đak hơpăh ăn Grat 55 sơnăm jang Đảng. Roi hơiă hlŏh dơ̆ng, inh đei 4 ‘nu kon hrei ‘nâu kŭm đei hŏk pơhrăm truh tôch, bơ̆ jang ăn teh đak păng đei mât jang đảng ngăl…”

             - Apinh hơiă hơdai hăm ih găh dôm tơdrong jơnei lơ̆m khei ‘năr bơ̆ jang kăch mang kŭm nhen lơ̆m tơdrong arih xa hrei ‘nâu. Bĭ ih hăm đei nơ̆r tơtă yă kiơ hăm pơlei pơla păng đe druh dăm hrei ‘nâu ưh?

            -Ƀok Đinh Nan: “Vă teh đak gơ̆h rơngei hiôk hian nhen hrei ‘nâu, inh ƀôh chăl nhôn sơ̆ adrin hŭt jơhngâm iung tơblăh, chu hŭt hơkâu tôch pơmat tat ‘mơ̆i. Inh hơnơ̆ng roi tơƀôh ăn kon pơlei athei mât 1 ƀơ̆r đon, đĭ đăng 54 hơdrĕch hơdrung nhen mĭnh, mât 1 ƀơ̆r đon pơjing teh đak, adrin hŏk pơhrăm, tơgop jơhngâm vei kơjăp teh đak, pơjing tơdrong arih xa phĭ tơtŏ dơnŏ ‘lơ̆ng. Nhôn hơnơ̆ng pơtho tơƀôh ăn druh dăm ưh gơ̆h put kiơ̆ nơ̆r đe hơlĕnh, tơjră phă ngơ̆r teh đak mă athei hŏk iŏk dôm tơdrong ‘lơ̆ng, trŏ ƀlep, adrin jang xa, pơtăm bơ̆n cheh phe, jang ƀa đak vă tơdrong arih xa roi đunh roi tŏk ‘lơ̆ng, roi phĭ tơnŏ. Yoa chăl nhôn sơ̆ tôch pơmat tat bơih kơna tơtă ăn chăl druh dăm hrei ‘nâu adrol vă jang yă kiơ athei tơchĕng hơlen mă tôm, sơ̆ đĭ đăng hơdrĕch hơdrung bơ̆n pơmat tat dêh, kơna athei veh hơtăih dôm tơdrong pơm glăi, ưh gơ̆h mơ̆ng nơ̆r đe pơhlŭ, dui hor, pơm tơdrong glăi. ”

             - Ƀok Nan ăi, 80 sơnăm hlŏh bơih, hăm tơdrong chĕp kơ̆l pơgơ̆r đơ̆ng Đảng, tơdrong pring vei đơ̆ng pơlei pơla, Khul linh kon pơlei Việt Nam hơdrin jang tŏk pran ‘lơ̆ng, kŭm hăm đĭ đăng Đảng, đĭ đăng kon pơlei jang đei lơ tơdrong tih tên, vang tơgop tôch tơgăl ăn tơdrong tơblăh iŏk rơngei hơdrĕch hơdrung, pơjing đei 1 teh đak kơjăp ‘lơ̆ng nhen hrei ‘nâu. Ih hăm ƀôh čhôk ‘nă hăm tơdrong ‘nâu ưh?

               -Ƀok Đinh Nan: “Bơ̆n a hrei hiôk hian bơih, teh đak bơ̆n pơm boăl hăm lơ teh đak. Kơna teh đak đe kŭm năm ngôi tơ̆ teh đak Việt Nam bơ̆n, tơ̆ dêh char Gia Lai bơ̆n, đe hơnơ̆ng tơchĕng ‘lơ̆ng găh tơdrong sơđơ̆ng chinh trĭ, jang tŏk pran, tơdrong arih xa, hnam oei roi ‘lơ̆ng, kon hơ ‘lơ̆p đei hŏk pơhrăm… Yoa thoi nŏh athei găn pơđĭ tơdrong phă ngơ̆r teh đak, pơm chere băl, athei găn lê̆ đon tơchĕng kơnê̆, ‘mĕh tơjră teh đak…Đĭ đăng athei adrin jang xa, hŏk pơhrăm… đei thoi noh mă pơlei pơla, teh đak bơ̆n gơ̆h jang tŏk pran, roi đunh roi kơjăp ‘lơ̆ng lei mă kon bơngai bơ̆n gơ̆h hiôk hơiă, inh vă thoi ei”.

            -Lei a, bơnê kơ ih ƀok Đinh Nan vang tơgĕch pơma nuh hăm nhôn hơ!