Ƀok Nguyễn Trọng Nghĩa pơtruh nơ̆r chơt hơiă ‘lơ̆ng hloh ƀlep ƀơ̆t Tơbăt 68 sơnăm Năr Thây pơgang Việt Nam truh dôm jơhnơr thây pơgang, kŭm hăm đe kơdră chĕp kơ̆l păng đĭ đăng kang ƀô̆, bơngai jang kơ 2 hnam pơgang.

Vang tơgŭm hăm dôm mơmat tat, long nol păng apĭnh đơ̆ng kơdră chĕp kơ̆l Hnam pơgang, ƀok Nguyễn Trọng Nghĩa akhan, tơ̆ hơnăp kơnh anih jang pơgang gô athei tơjră hăm lơ mơmat tat, long nol, yua thoi noh đe y ƀak si kăl kơ hơnơ̆ng hơdrin, hơmet ming rim tơdrong mơmat tat, hơtŏk đon hơgei, gơh jang đơ̆ng kơ dih, vei răk jơhngơ̆m đon ‘lơ̆ng, hơtŏk tơdrong ‘lơ̆ng tơchĕng hơlen khoa hŏk, pơtho pơhrăm kang ƀô̆ tơklep hăm tơdrong bơ̆jang kiơ̆ trong jang mŭk drăm vei lăng tơdrong arih sa, hơtŏk ‘lơ̆ng iŏk yua ăn khŭl kang ƀô̆ y ƀak si bơ̆jang tơdrong jang vei lăng păng hơtŏk ‘lơ̆ng jơhngơ̆m pran kon pơlei. Vă đơ̆ng noh tơgăl jing dôm hnam pơgang tơm kơ lơ̆m teh đak.