Tơring tơmang pơhiơ̆ cham char Tơpôl Ko Tam, tơ̆ xăh Ea Tu, pơlei tơm Buôn Ma Thuột gô jing anih pơgơ̆r tơdrong Pơlong chrăh chhơ̆ um rŭp đơ̆ng tơm ka phê. Dang ei, anih jang âu tŏk bŏk oei keh đang dôm tơdrong kăl mă hơtuch luch vă hơmet tôm tơmam drăm ‘lơ̆ng hloh ăn Tơdrong Pơlong adoi nhen ‘măn ăn tơmoi chă tơmang lăng, oei xa ƀơ̆t truh hơlen băt tơ̆ âu. Yă Nguyễn Thị Ngọc Anh, Kơdră anih tơmang pơhiơ̆ Tơpôl Ko Tam ăn tơbăt: “Nhôn ưh adrô̆ hơmet ăn tơdrong chrăh chhơ̆ um rŭp joh ayŏ mă nhôn oei hơmet cham char, anih oei xa. Dang ei nhôn oei hăt hot keh đang 10 tŏ hnam oei vă hơtŏk đei 26 tŏ hnam, tôm gơng âu to nhôn hlôi hơmet păng hơtŏk dôm tơmam drăm păng hơmŏ ăn tơdrong pơtơm păng pơtôch kơ Tơdrong pơlong vă pơm ăn Tơdrong pơlong trŏ kiơ̆ tơchơ̆t đơ̆ng dêh char, tơgop pơjing um ai kăp gĭt ăn tơmoi truh tơmang tơ̆ Đăk Lăk”

Anih tơmang pơhiơ̆ gơng hơneh Buôn Đôn adoi oei hơmet pơ-‘lơ̆ng cham char, kơchăng xơng tơmoi. Mă kăl, adrol kơ Lêh akŏm ka phê xơnăm âu, Anih jang pơdơh tơdrong yŭn Rôih vă vei rong xơđơ̆ng hăm Rôih hnam kơ dêh char. Pơtăl kơ noh, tơplih trong tơmang tơguăt hăm Rôih, đei hloi tơdrong hơlen hơ-iă nhen: tơmoi năm truh lăng, hơlen băt găh rôih, năm tơmang chŭp um hăm rôih, ăn rôih xa... Atŭm hăm noh tơmoi oei đei akŏm kăm trăi ăh kơmăng tơ̆ Pơlei Achon teh, pơgiơ̆ng jơmŭl unh khơ̆ng, pơdreh chĭng chêng, xa dôm tơmam xa kăp gĭt kơ tơring bri kơdrơ̆ng ăn tơmoi...  

Yă Trần Thị Kim Ánh, Kơdră Anih jang tơmang pơhiơ̆ păng khăch sạn Biệt Điện, anih jang Vei lăng anih tơmang gơng hơneh Buôn Đôn ăn tơbăt, truh khei năr âu 50 lăm tep pơdơh kơ Khăch sạn Biệt Điện hlôi chih măt tôm. Tơdrong hơmet ăn dôm tơdrong jang tơ̆ anih tơmang pơhiơ̆ gơng hơneh Buôn Đôn duh xơđơ̆ng. Tơdrong vei xơđơ̆ng rơgoh tơmam xa păng vei xơđơ̆ng tơpôl adoi đei anih jang tơrĕk truh: “Anih jang nhôn duh tơrĕk kăp gĭt lơ̆m tơdrong vei rơgoh tơmam xa ăn tơmoi truh tơmang. Lơ̆m vei rơgoh tơmam xa nhôn duh hlôi rơih dôm anih pơtrruh ‘lơ̆ng xơđơ̆ng, tơmam drăm đei anih pơtơm hơdăh vă vei rơgoh tơmam xa ăn tơmoi. Hăm tơdrong dăng oei ăh kơmăng tơ̆ anih tơmang pơhiơ̆ gơng hơneh Buôn Đôn noh lơ̆m ‘măng Lêh akŏm nhôn gô hơtŏk bơngai jang vei hơlen vă vei xơđơ̆ng ăn tơmoi”

Pơlei tơm Buôn Ma Thuột jing anih pơgơ̆r dôm tơdrong akŏm tơm kơ ‘măng akŏm. Kơchĕng, âu gô jing anih “ang bang” xơng tơmoi truh tơmang. Jing minh lơ̆m dôm khăch sạn 4 sao kơ dêh char, khăch sạn Elephants (phương Thắng Lợi) hlôi chih măt tôm lăm oei đơ̆ng năr 9 truh năr 11/3. Dôm năr đơ̆ng rŏng kơ noh, kơsô̆ tơmoi chih măt truh oei adoi đei truh 90%. Ƀok Lê Văn Đức, Kơdră Khăch sạn Elephants ăn tơbăt, dang ei anih jang hlôi keh đang dôm tơdrong kăl iĕ hloh vă tơmoi hiôk hơ-iă ƀơ̆t truh hăm Lêh akŏm ka phê Buôn Ma Thuột: “Khăch sạn Elephants duh hlôi hơmet tơnăp tôm tơdrong, dôm tơmam drăm kăl adoi đei hơmet tôm, dôm tơdrong kăl pơm mă rơgoh ‘lơ̆ng, xơđơ̆ng găh tang găn păng pĭt unh xa, vei rơgoh tơmam drăm xa. Pơhrrăm dơ̆ng ăn dôm bơngai jang băt găh tơdrong jong pơm jang ăn tơmoi. Khăch sạn duh vei xơđơ̆ng pơkăp ưh đei hơtŏk kơjă”

Kiơ̆ kơ yă Nguyễn Thụy Phương Hiếu, Phŏ Kơdră Anih Joh ayŏ, Tơplŏng kơdâu păng Tơmang pơhiơ̆ dêh char Đăk Lăk noh, lơ̆m ‘măng lêh akŏm âu hơvơn đei đơ̆ng 40.000 – 50.000 ‘nu tơmoi truh akŏm. Truh khei năr âu, đei hloh 80% khăch sạn, anih dăng oei lơ̆m tơring hlôi chih măt oei tôm. Vă axong măh ăn kơsô̆ tơmoi tŏk lơ, Anih jang pơkăl dôm anih jang găh tơmang pơhiơ̆ hơlen lăng tôm tơdrong tơmang pơhiơ̆ hlôi đei, hơlen păng hơmet tôm tơdrong pơkăp vei xơđơ̆ng ăn tơmoi. Yă Hiếu ăn tơbăt, dêh char gô “jang kơtang” lơ̆m tơdrong xek tơlang tơdrong “hơtŏk kơjă kăp” hăm tơmoi: “Dêh char duh hlôi đei hla bar pơkăp pơgơ̆r ăn Anih jang vei lăng kon pơlei rim apŭng, thĭ xăh atŭm hăm anih jang vei lăng jơhngơ̆m jăn, vei lăng pơgang, hơlen păng hơmet jĭ jăn, Anih jang vei lăng tơring Tĕch răt, Anih jang Kŏng thương vei xơđơ̆ng kơjă tơmam drăm adoi nhen vei xơđơ̆ng tơpôl păng tơdrong jang tang găn păng hơmet jĭ jăn, vei rơgoh tơmam drăm xa. Oei Anih jang noh hăm dôm anih tơmang pơhiơ̆, anih jang duh pơgơ̆r dôm anih jang athei tơnăp lơ̆m tơdrong jong ăn tơmoi, ưh đei hơtŏk kơjă. Tơdrong jang hơlen adoi đei pơkăp vă hơlen lăng adrol, lơ̆m păng đơ̆ng rŏng kơ Lêh akŏm găh tơdrong âu”

Tơdrong hơmet tơnăp đơ̆ng dôm anih jang, anih mŭk drăm păng tơring ăn 'măng Akŏm ka phê Buôn Ma Thuột 'măng mă âu hơpơi gô hơ-'nhăk truh tơmoi tơmang dôm tơdrong hơlen băt 'lơ̆ng hơ-iă, kăp gĭt păng xơđơ̆ng ƀơ̆t truh hăm Đăk Lăk lơ̆m dôm năr pơgơ̆r Lêh akŏm.