Hlôi jing juăt, hơnơ̆ng ăh jê̆ đĭ giĕng, khul vei hơlen trong xơlam teh pơlei Drăng Phốk, xăh Krông Na, apŭng Buôn Đôn, yak hadoi hăm đe kang ƀô̆, khul linh tơ̆ Kơđông ƀô̆ đô̆i vei xơlam teh SêrêPôk chă dăr juang, hơlen trong pơkăp jrăng xơlam teh. Ƀok Y Mosk H’ra, bơngai đei kơdrưh kơ pơlei ăn tơbăt, kon pơlei hlôi erih đunh đai tơ̆ tơring tơm kơ Pơgar pơkăp Yok Đôn, kơyuơ noh, atŭm hăm vei trong pơkăp xơlam teh, xơnong jang vei lăng bri lơ̆m tơring xơlam adoi đei tơrĕk truh. Kră pơlei, dôm bơngai đei kơdrưh hơnơ̆ng chơng trong ăn đe mơlôh kơ pơlei năm hadoi hăm khul linh vă vei lăng rim tơm 'long hơgăt teh tơ̆ tơring xơlam:  “Tôm kon pơlei nhôn hăt hot jang hadoi hăm Kơđông ƀô đô̆i vei xơlam teh SêrêPôk, khul pơm jang tơ̆ pơlei, găh bri noh tơguăt hăm khul jang vei hơlen bri 'long kơ Pơgar pơkăp Yok Đôn vă vei lăng bri păng vei lăng jrăng xơlam teh. Tơroi tơbăt đơ̆ng bơngai 'lŏ truh bơngai hơ-ioh noh athei vei lăng kơjăp jrăng xơlam teh, đang kơ noh tơroi hăm đe mơlôh noh nĕ chă kơdâu găn xơlam teh truh teh đak boăl”

Tơ̆ xăh xơlam teh Ia Lốp (apŭng Ea Súp), 12 thôn adoi đei tơ-iung pơjing ăh xơnăm 2006 kiơ̆ Tơchơ̆t yông kon pơlei hơtŏk jang mŭk drăm 'nao đơ̆ng Binh đoàn 16 – Anih tơm jang găh Khul linh vei xơđơ̆ng teh đak noh Khul jang mŭk drăm kơ Anih jang găh linh 737, Kuân khu 5. Pơmai Hà Thị Phê, tơ̆ thôn Đừng, xăh Ia Lốp ăn tơbăt, truh tơ̆ âu pơm jang ăh oei tơdăm, lơ̆m 17 xơnăm erih jang xa, oei unh om, pơmai duh nhen lơ bơngai hlôi lăng tơring âu noh pơlei pơla mă 2 kơ po. Kon pơlei tơ̆ âu adoi băt hơdăh xơnong jang po hăm teh đak. Vei xơđơ̆ng trong pơkăp jrăng xơlam tehnoh jing vei lăng tơdrong erih kơ rim unh hnam, rim thôn, pơlei. Rim kon pơlei hlôi lăng kơdih po noh nhen jrăng xơlam teh tơ̆ tơring xơlam: “Đei tơdrong chă tơroi tơbăt đơ̆ng đe 'nhŏng ƀô đô̆i vei xơlam teh găh tơdrong vei lăng trong xơlam kơ teh đak, kơdih po inh atŭm hăm unh hnam băt hơdăh tơdrong mă âu tơpă kăp gĭt hăm kon pơlei nhôn. Inh duh gô hơvơn unh hnam, 'nhŏng oh, kon mon kon xâu hơnơ̆ng jang atŭm hăm đe 'nhŏng ƀô đô̆i vei xơlam teh, khul tơdăm vei lăng pơlei pơla, kŏng ang xăh vang jang vă vei lăng xơlam teh”    

Dêh char Đăk Lăk đei hloh 71 km trong xơlam teh tơkuh hăm teh đak Campuchia. Pơm kiơ̆ Tơchơ̆t kơsô̆ 01/CT-TTg, năr 09/01/2015 đơ̆ng Thủ tướng teh đak “Găh pơgơ̆r tơdrong jang tôm kon pơlei vang vei lăng hơgăt teh, vei xơđơ̆ng tơpôl tơring xơlam kơ teh đak lơ̆m pơkăp jang 'nao”, jơnŭm pơgơ̆r tơring dôm xăh xơlam teh hlôi jang atŭm kơjăp hăm dôm kơđông ƀô đô̆i vei xơlam teh, dôm khul grŭp pơm jang tơ̆ tơring xơlam teh, jang tơnăp tơdrong vei xơđơ̆ng tơpôl, vei xơđơ̆ng tơdrong pơgơ̆r kơdih, vei xơđơ̆ng tơpôl kơ teh đak. Lơ trong jang găh vei xơđơ̆ng tơpôl hlôi đei pơjing păng pơgơ̆r jang tơnăp nhen: “khul mơlôh hăm khôi luơ̆t”, “teh kŏk vei xơđơ̆ng tơpôl”, “jơva kŏk tơbăt kon pơlei vei lăng tơpôl”. Lơ̆m tơring teh kơ 4 xăh xơlam teh lơ̆m 2 apŭng Buôn Đôn păng Ea Súp dang ei đei hloh 2.400 khul jang, unh hnam pơm jang, tơ-'ngla bơngai kơdih chih măt vang jang vei lăng jê̆ 60 km jăl trong xơlam teh păng 4 jrăng pơkăp xơlam teh. Trung tá Nguyễn Thanh Tùng, Kơdră kơđông Ƀô đô̆i vei xơlam teh Ea H’leo, Ƀô đô̆i vei xơlam teh dêh char Đăk Lăk ăn tơbăt, tơdrong jang hadoi hăm kơđông linh hăm dôm anih jang chĭnh trĭ tơpôl, rim khul jang kơ jơnŭm tơpôl tơ̆ dôm thôn pơlei tŏk bŏk pơyua tơnăp lơ̆m tơdrong jang vei xơđơ̆ng tơpôl tơring xơlam teh kơ teh đak: “Anih jang hlôi jang atŭm hăm dôm anih jang đei tơrĕk, đei dôm pơkăp hăm jơnŭm jang đe drăkăn, jơnŭm khul linh xo, vang jang atŭm hăm khul ƀô đô̆i vei xơlam teh vă chă hơlen, vei lăng jrăng pơkăp xơlam teh. Rim thôn tơ̆ tơring teh chih măt ưh đei pơm glăi păng kơchăng atŭm hăm ƀô đô̆i vei xơlam teh iung tơjră, tơkêng tơhlâu dôm tơdrong pơm glăi đei ƀôh tơ̆ tơring xơlam teh”

Đại tá Đào Viết Hùng, Kơdră Anih tơm Pơgơ̆r Linh vei xơlam teh dêh char Đăk Lăk ăn tơbăt, atŭm hăm “Tơdrong jang tôm kon pơlei vang vei lăng tơdrong pơgơ̆r kơdih hơgăt teh, vei xơđơ̆ng tơpôl xơlam teh lơ̆m pơkăp jang 'nao”, tơdrong pơjing, hơmet pơ-'lơ̆ng tơdrong jang kơ dôm anih jang Đảng, Jơnŭm pơgơ̆r tơring păng rim jơnŭm tơpôl tơ̆ xăh xơlam teh pơma atŭm đei hơmet pơ-'lơ̆ng păng roi năr pơm jang roi đei jơnei kơjăp. Khul kang ƀô̆, đảng viên kơđông ƀô đô̆i vei xơlam teh đei pơtruh chă akŏm tơ̆ dôm thôn, pơlei, kang ƀô̆ vei xơlam teh vih bơ̆ phŏ ƀĭ thư dôm xăh tŏk bŏk đei pơm jang tơnăp xơnong jang dơnơm, dôm tơdrong jang hơtŏk mŭk drăm – joh ayŏ –  tơpôl, vei xơđơ̆ng pơkăl hơtŏk mŭk drăm tơguăt hăm vei xơđơ̆ng tơpôl tơring xơlam teh: “Nhôn tơlĕch pơkăp bơ̆ jang hăm hwên ủy, rim kơđông ƀô đô̆i vei xơlam teh tơlĕch pơkăp bơ̆ jang hăm đảng uỷ dôm xăh vă akŏm đei tơdrong pơdrơ̆ng lơ̆m đảng găh tơdrong pơgơ̆r jang, đang kơ noh drơ̆ng nơ̆r lơ̆m iŏk yua khul jang. Pơtih nhen lơ̆m tơdrong jang vei lăng tơring xơlam teh noh nhôn athei jang hadoi tơnăp kiơ̆ Tơchơ̆t 03 đơ̆ng Thủ tướng teh đak. Hăm tơdrong jang tôm kon pơlei noh nhôn xơkơ̆t 'meh jang tơnăp adrol hloh noh athei akŏm atŭm hăm dôm jăl pơgơ̆r, jơnŭm pơgơ̆r tơring hơmet pơ-'lơ̆ng anih jang, mă kăl noh anih jang đảng. Dang ei tơ̆ 2 apŭng xơlam teh đei 38 thôn pơlei noh nhôn adoi đei kang ƀôh jang vei xơlam teh vang akŏm atŭm hăm dôm thôn pơlei”

Atŭm hăm tơdrong adrin kơ-'nôh đơ̆ng đe linh chô̆ kơlong jơk, tơdrong atŭm jơhngơ̆m đơ̆ng kon pơlei hlôi tơgop vei lăng kơjăp tơdrong pơgơ̆r kơdih hơgăt teh, vei xơđơ̆ng tơpôl tơring xơlam teh kơ dêh char Đăk Lăk.