Rim dêh char lơ̆m tơring đei đơ̆ng 5 - 6 ‘nu bơngai tang măt vang truh Hop akŏm druh dăm rơgei jang kiơ̆ nơ̆r Pơtho đơ̆ng Ƀok Hô ‘măng mă VIII tơ̆ plt HCM. Ƀlep ƀât ‘măng mă âu, Anih jang đoan dêh char Đắk Nông pơgơ̆r pôk pơ 28 ‘nu druh dăm rơgei, jang kiơ̆ nơ̆r Ƀok Hô pơtho păng 17 ‘nu đảng viên mơlôh rơgei kơ dêh char Đắk Nông đơ̆ng 2023 - 2025. Ƀlep ƀât ‘măng mă âu mơ̆n, Khul kơdră chĕp kơ̆l Trung ương Đoàn hơpăh Ƀăng khen ăn 2 ‘nu bơngai, 1 khul grŭp păng Anih jang đoan dêh char Gia Lai hơpăh ƀăng khen ăn 5 ‘nu bơngai, 5 khul grŭp yoa jang đei jơnei ‘lơ̆ng lơ̆m tơdrong jang tơm kơ teh đak pơjing tơring tơrang ‘nao đơ̆ng 2021-2025.

‘Nhŏng Kpuih Rung – Bí thư Đoàn xăh Ia Hla, apŭng Chư Pưh, dêh char Gia Lai tơroi truh 1,2 tơdrong jang tơ̆ tơring: “Tơbăt Năr rơnĕh Ƀok Hô, Đoàn xăh Ia Hla pơgơ̆r lơ tơdrong jang tôch hơiă. Mă hơdăh Đoàn, druh dăm xăh jang hơdoi hăm Khul drŏ kăn păng dôm khul grŭp nai pơgơ̆r tơƀâp, pơma nuh găh tơdrong jang ƀơm truh tơ̆ Ƀok Hô, chă pơđou dơ̆ng tơdrong jang kăch mang, pơgơ̆r ngôi pơchơt, hơri hơxoang, tơplŏng kơdâu nhen hơri dôm ƀai Pơ ư kơ Ƀok Hô păng thi păh ƀŏng lŏng... ‘Ngoăih kơ ‘nŏh, pơgơ̆r bơ̆ jang tơgŭm, hơpăh tơmam ăn đe hơioh jo jăn, năm ngôi păng hơpăh tơmam ăn đe kră jang kăch mang, dôm unh hnam  đei kŏng”.