Đơ̆ng rŏng kơ lêh sơng, Đại tướng Phan Văn Giang hlôi pơma đam hăm Đại tướng Tea Banh. Tơ̆ jơ pơma đam, Đại tướng Phan Văn Giang păng Đại tướng Tea Banh drơ̆ng nơ̆r akhan, sơnăm 2022 âu ki jĭ sơnăm tôch gĭt kăl hăm tơdrong pơvei kơ 2 tĕh đak, đei kơdră chĕp kơ̆l 2 tĕh đak năng jĭ “Sơnăm jang tơbôl Việt Nam-Campuchia, Campuchia-Việt Nam”.

Găh trong vă jang hơdoi tơ̆ hơnăp kơnh, Đại tướng Phan Văn Giang păng Đại tướng Tea Banh drơ̆ng nơ̆r dôm tơdrong vă jang hơdoi găh khul linh lơ̆m sơnăm 2023 ‘moi kiơ̆ đon lui băl, bơ̆ jang đei yoa tơ̆ yăn âu, pơma truh 1,2 tơdrong tơm đei: Hơtŏk tơdrong roi tơbăt ăn băl, vang pơgơ̆r dăr joang, vei kơjăp tơdrong sơđơ̆ng tơ̆ kông păng tơ̆ đak dơsĭ; jang hơdoi ‘lơ̆ng dôm trong jang đei ƀơm truh lơ̆m sơnăm Campuchia iŏk pơgơ̆r SEA Games 32 păng ASEAN Para Games 12; hơnơ̆ng năng kăl tơdrong jang hơdoi mưh pơtho pơhrăm bơngai jang, vang chă, sir akŏm, chơ chuĕn kơting linh păng bơngai juăt jang đơ̆ng Việt Nam lôch tang tơ̆ tĕh đak Campuchia lơ̆m khei ‘năr tơblăh vang sơ̆.