Anih jang vei rong kon tơrong tơring kơchăng tơlĕch jang lơ trong jang vă vei sơđơ̆ng hơnih pơtrŭh păng ‘lơ̆ng tĕch lơ̆m anih tĕch mơdro. Akŏp rơmo, nhŭng, iĕr bip lơ̆m dêh char Đắk Lắk dang ei đei vă 18 triệu 500 tŏ, tŏk dang hloh 1 triệu tŏ pơting hăm sơnăm hơdrol.

Kơsô̆ ‘nhĕm dôm kơloăi jô̆ pơhlom đei 256.700 tấn, tŏk 11.700 tấn, pơm lăp hăm ‘meh vă tĕch lơ̆m dêh char păng dôm tơring tơ jê̆ lơ̆m năr Tết vă jê̆ truh. Ƀok Nguyễn Văn Hà, Phŏ Kơdră Anih vei lăng găh Choh jang sa păng Hơtŏk tơiung tơring tơrang dêh char Đắk Lắk ăn tơbăt: dôm hơp tak xăh, hơnih rong kon tơrong, ŭnh hnam vei rong lơ̆m dêh char tŏk bŏk hơtŏk kơsô̆ vă tơtom tĕch ăn anih tĕch mơdro hơtuch sơnăm. Anih jang hlôi athei dôm anih jang ƀơm truh hơtŏk loi dơ̆ng tang găn jĭ tơ̆ kon tơrong, hơlen lăng rơgoh tơmam sa tơ̆ dôm hơnih ket ƀuh akŏm, dôm kơchơ tơm vă vei lăng ‘lơ̆ng tơmam.