Ƀơ̆t sơnăm blŭng bơ̆jang kiơ̆ Tơdrong pơtho pơhrăm phô thŏng 2018, Dak Lak jĭ 1 lơ̆m kơ sô̆ dôm dêh char pŭ ƀơm ưh kơ ‘lơ̆ng dêh hloh yua đơ̆ng jĭ Covid-19. Vă đĭ đăng khei ‘năr âu, hŏk tro athei hŏk trực tuyến. Yua thoi noh, mơ̆t lơ̆m sơnăm hŏk đơ̆ng rŏng dơ̆ng, dôm hnam trưng athei hiong lơ khei ‘năr vă pơtho dơ̆ng tơdrong hlôh vao ăn kơ đe oh, hơdai hăm tơdrong pơgơ̆r trong tơlĕch jang pơtho păng hŏk mă lăp hăm tơdrong pơtho pơhrăm phô thŏng ‘nao. Ƀok Phạm Xuân Mỹ, Kơdră vei lăng hnam trưng teh đak rong ‘me hŏk tro kon kon kông jăl 2 apŭng Krông Pắc, tơbăt: “ Ƀơm truh tơdrong  joăt jang ‘noh jĭ athei pơjing ƀai hŏk tơƀôh ăn, tơdrong ‘nâu hnam trưng hlôi athei dôm grŭp joăt jang pơma dơnuh drơ̆ng nơ̆r rơih iŏk ƀai pơtho thây kô pơtho tơƀôh ăn tơchĕng hơlen dôm tơdrong pơtho môn hŏk kiơ̆ môn hŏk mă hla ar hŏk dăh mă hla ar ‘nao ‘meh vă.”

Mĭnh lơ̆m dôm tơdrong ‘meh vă ƀơ̆t tơlĕch tơdrong pơtho pơhrăm ‘nao ‘noh jĭ pơgơ̆r hŏk 2 ‘măng 1 năr, mă loi ‘noh jĭ hăm jăl 1. Mă lei, lơ tơring lơ̆m dêh char Dak Lak oei đei tơdrong ưh kơ măh hnam trưng, ưh kơmăh lăm, tơmam pơtho hŏk tam mă tôm kiơ̆ ‘meh vă. Kô Hoàng Thị Cúc, kô pơtho hnam trưng hŏk jăl 1 Trần Quốc Toản, thị trấn Ea Pốc, apŭng Cư Mgar tơbăt: “Lơ̆m pơhrăm đei tơmam yua tôm ăn kơ đe thây kô, oei tơ̆ âu đe kô ưh kơ đei. Đe kô lăp pơ tho hoh đĕch, lăng lơ̆m hla ar ăn hla ar vă hŏk tro lăng lơ̆m ‘noh hŏk đĕch. Kơna 1 tiêt hok thoi noh 3-4 âm hŏk tro ‘nao hŏk âm ‘nâu ‘noh koa âm nai tôch kơ mơ mat ăn kơ đe oh oei mưh lê̆ đe oh pơhrăm ‘noh đe kô pơtho ưh kơ tom.”

Hơdai hăm ‘noh, tơdrong ưh kơ măh thây kô pơ tho kŭm tŏk bŏk jing tơdrong pơgăn hăm anih jang pơtho pơhrăm Dak Lak. Tơdrong pơtho dôm môn akŏm tơplih yua kơ hơdrô̆ môn nhen hơdrol sơ̆ kŭm pơm ăn thây kô pơtho mơ mat, mă loi ‘noh jĭ thây kô pơtho hŏk tơ̆ jăl 2. Ƀok Phạm Ngọc Lĩnh, Kơdră vei lăng Hnam trưng hŏk jăl 2 Ea Tu, xăh Ea Tu, pơlei tơm Buôn Ma Thuột, dêh char Dak Lak tơbăt: “ Khŭl thây kô pơtho kơ hnam trưng oei ưh kơ măh, kơna 1 kơ sô̆ môn hơmet oei tôch kơ mơmat tat. Mă 2, dôm môn akŏm pơtih gia nhen môn khoa học tự nhiên ‘noh dang ei tam mă đei thây kô hơ drô̆ môn ‘nâu mă athei pơtho đơ̆ng 3 thây kô môn akŏm pơtho ‘noh thây kô pơtho Hoá học, lịch sử, sinh học kŭm nhen môn lịch sử địa lý ‘noh dang ei tam mă đei thây kô pơtho hơdrô̆ mă athei đei 2 thây kô pơtho dăh mă thây kô lịch sử pơtho địa lý dăh mă thây kô địa lý pơtho lịch sử”.

Kiơ̆ kơ Anih vei lăng găh pơtho pơhrăm dêh char Dak Lak, dang ei lơ̆m dêh char oei ưh kơmăh 1.200 thây kô pơtho, bơngai jang kiơ̆ tơdrong hơgăt; kơ sô̆ lăm hŏk kăl kơ man ‘nao pơm lăp hăm ‘meh vă hŏk 2 ‘măng 1 năr ‘noh vă jê̆ 500 lăm. Dôm tơdrong ưh kơ măh âu hlôi ƀơm ưh kơ ‘lơ̆ng tôch kơ tih truh tơdrong jang kŭm nhen tơdrong ‘lơ̆ng bơ̆jang kiơ̆ tơdrong pơtho pơhrăm phô thŏng 2018 đơ̆ng dêh char. Dôm hnam trưng athei chă pơgơ̆r pơtho păng hŏk kơ dih kiơ̆ tơdrong đei yan âu hơdrol kơ dêh char hơmet pơ ‘lơ̆ng đei tơdrong găh tơmam, kơmăy kơmŏk pơtho hŏk, thây kô pơtho.