Lăp đơ̆ng rŏng hơgrop, dêh char Dak Lăk đei groi teh să hloh 18.000 km2, măt bơngai kon pơlei đei 3.346.853 ‘nu. Ƀok Nguyễn Đình Trung, Kơdră jang lơ̆m Trung ương Đảng đei pơjao tŏk pơm Ƀĭ thư Đảng Dak Lăk, ƀok Tạ Anh Tuấn đei pơjao pơm Kơdră chĕp pơgơ̆r Hơnih vei lăng kon pơlei dêh char Dak Lăk. Pơjao ăn hla bơar Tơchơ̆t pơjing dêh char ‘nao păng iung pơma tơ̆ pơm lêh, ƀok Lê Hoài Trung, Bí thư Trung ương Đảng, Chánh Văn phòng Trung ương Đảng sơkơ̆t hơdăh: Hăm tơdrong joăt joe tơgoăt tơgoăl ‘lơ̆ng, jơhngơ̆m đon nuih mơng păng jơhngơ̆m đon tơplih ‘nao, tơchăr hơgei đang ƀô̆, kơdră chĕp pơgơ̆r tơring păng kon pơlei rim hơdrung dêh char Dak Lăk atŭm hăm tơdrong chĕp pơgơ̆r kơjăp, tơgum djru tơtom đơ̆ng Trung ương bơ̆n gô jang kiơ̆ ‘lơ̆ng jơhngơ̆m pran, kiơ̆ yok rok jơ̆ng kơjăp dôm tơdrong hlôi iŏk đei, pran kơtang kĕ yak hloh dôm tơdrong tơnap tap, tơdrong long. Ưh kơ jor, dôm tơdrong đei păng rơvơn kơ Dak Lăk ‘nao gô iung jang iŏk đei jơnei kơtang, ba dêh char Dak Lăk atŏk tơ iung, đei jing tơring tŏk kơtang, đei hơnăp jang chông ba tơ̆ tơring Tây Nguyên păng Tơring tơmăn Nam Trung Bộ.