Xăh xơlam teh Ia Lốp đei tơ-iung pơjing ăh xơnăm 2006 kiơ̆ pơkăp yông kon pơlei hơtŏk tơring jang xa 'nao đơ̆ng Binh đoan 16 – Anih tơm Linh vei xơlam teh noh Đoan jang mŭk drăm Anih linh vei xơđơ̆ng tơpôl teh đak 737, Kuân khu 5; kơsô̆ măt kon pơlei tơ̆ xăh âu dang ei đei pơhlom 6.600 'nu, hăm 15 hơdrung bơngai atŭm erih jang xa. Lơ̆m dôm xơnăm kơ âu, xăh Ia Lốp hlôi jang atŭm kơjăp hăm dôm anih jang, jơnŭmt ơpôl, dôm khul tŏk bŏk oei pơm lơ̆m tơring teh, mă kăl noh Kơđông ƀô đô̆i vei xơlam teh 735, Đoan  jang mŭk drăm Anih linh vei xơđơ̆ng tơpôl teh đak 737 păng Kŏng ang apŭng Ea Súp jang tơnăp tơdrong vei xơđơ̆ng tơpôl, tơdrong akŏm tôm kon pơlei vang vei lăng tơdrong pơgơ̆r kơdih kơ teh đak, vei xơđơ̆ng tơpôl tơring xơlam teh. Lơ̆m pơkăp " 'Năr akŏm tôm kon pơlei vei xơlam teh” , tơ̆ xăh Ia Lốp hlôi pơgơ̆r lơ tơdrong jang kăp gĭt nhen: tơlĕch khăm, axong pơgang hơmet jĭ ưh iŏk jên, vei lăng jơhngơ̆m jăn ăn hloh 500 'nu kon pơlei; axong ăn 1 pôm hnam  “bơbŭng hnam xơlam teh”; axong 10 tong gre jrot ăn đe hŏk tro đei tơdrong erih tơnap tap; jê̆ 30 tơpu tơmam ăn ƀĭ thư, kơdră jơnŭm vei hơlen tơring, bơngai đei kon pơlei lui yom, erih rơgei lơ̆m tơdrong jang tôm kon pơlei vang vei lăng tơring teh kơ teh đak, vei xơđơ̆ng tơpôl tơring xơlam teh.