Tơ̆ 'măng pơlong hŏk tro hơgei jơ̆p teh đak, dêh char Đăk Lăk đei iŏk 72 tơmam hơpah, lơ̆m noh đei 2 hơpah mă mônh. 'Nou adoi jĭ tơdrong đei jơnei kơjung hloh đơ̆ng sơ̆ truh dang ei, pơkăp dơ̆ng mă 16 lơ̆m jơ̆p t/đ, pơtoi vei kơjăp anih dơ̆ng hơlou lơ̆m dôm dêh char tơring Tŏk bŏk păng Tây Nguyên. Mă kăl, đei 4 hŏk tro đei rơih mơ̆t pơlong 'măng kăp gĭt vă akŏm pơlong Olympic lơ̆m tơring păng lơ̆m apŭng plenh teh sơnăm 2025; 1 hŏk tro đei rơih tang măt ăn Việt Nam năm pơlong Olympic Tin học châu Á - Thái Bình Dương.

Tơ̆ lêh pôk hơpah, kơdră dêh char Đăk Lăk pôk bơnê kơ dôm tơdrong hơdrin đơ̆ng rim bơngai pơtho păng đe hŏk tro lơ̆m sơnăm ou ki, pơgơ̆r anih jang Pơtho Pơhrăm dêh char pơtoi vei kiơ̆ tơdrong jơnei, akŏm hơtŏk pơ-'lơ̆ng tơdrong pơtho pơhrăm tôm tong păng lơ̆m dôm tơdrong pơlong hŏk tro rơgei dôm jăl hŏk.