Mă lei, tơmoi truh hăm Đăk Lăk duh oei đei hơlen băt dôm tơdrong akŏm tơrĕk truh rôih, noh jing xoi tơbeh jơhngơ̆m jăn ăn rôih, 'nhăk rôih năm akŏm et xa buffet, pơlong pơguăng ăn kơ rôih, pơlong rôih hmach kơ tơmoi, chŭp um ƀlŏk tơbăt hăm rôih.

Kiơ̆ tơroi đơ̆ng Anih jang tơmang pơhiơ̆ păng khăch sạn Biệt Điện (tơ̆ pơlei tơm Buôn Ma Thuột, Đăk Lăk), đơ̆ng năr 10/2, anih jang pơtơm pơtôch hloi tơdrong akŏm yŭn rôih tơ̆ anih tơmang pơhiơ̆ Gơng hơneh Buôn Đôn tơ̆ xăh Krông Na, apŭng Buôn Đôn; pơtăl hăm tơdrong tơmang pơhiơ̆ 'nao ƀenh kơ um ai joh ayŏ tơ̆ tơring tơguăt hăm dôm tơdrong jang tơmang pơhiơ̆ tơguăt hăm rôih nhen ăn rôih chă tơmang pơchơt hăm tơmoi. Tơdrong jang âu vă pơm kiơ̆ tơchơ̆t đơ̆ng dêh char Đăk Lăk găh pơdơh lê̆ tơmang pơhiơ̆ yŭn rôih lơ̆m tơdrong jang tơmang pơhiơ̆ vă vei rong rôih hnam kơ dêh char tơnăp hloh, tơplih tơdrong jang tơmang pơhiơ̆ tơguăt hăm rôih hloh.

Adoi tơrĕk truh tơdrong jang âu, ăh 'măng akŏm Pơlong rôih Buôn Đôn – minh lơ̆m dôm tơdrong jang tơm kơ Lêh akŏm ka phê Buôn Ma Thuột 'măng mă 8, xơnăm 2023 pơgơ̆r ăh khei 3 âu kơnh tơ̆ Đăk Lăk, gô ưh đei dôm tơdrong nhen: pơlong kơdâu rôih, pơlong rôih glơi đak, pơlong rôih đă ƀơlŏng, ưh đei pơlong rôih tơlei hăm kon bơngai. Pơtăl kơ noh gô đei minh ƀar tơdrong nhen: Xoi tơbeh jơhngơ̆m jăn ăn kơ rôih, 'nhăk rôih năm et xa buffet, pơlong pơguăng ăn kơ rôih, pơlong rôih hmach kơ tơmoi, ăn rôih tơrĕk păng chŭp um hăm tơmoi truh tơmang... Ƀok Vũ Minh Thoại, Kơdră anih jang Joh ayŏ – Tơroi tơbăt apŭng Buôn Đôn ăn tơbăt: “Tơdrong âu duh jing pơm kiơ̆ pơkăp đơ̆ng Anih jang vei lăng kon pơlei dêh char hăm Anih jang găh kon char kơmar Châu Á. 'Nâu jing minh trong pơkăp jang păng pơm kiơ̆ tơnăp. Nhôn duh hơpơi 'moih kơlih tơpă dang ei vă đei rôih mă rim năr gơh vih vơ̆t pran jăng adoi jing minh mŭk drăm 'măn ăn jang tơmang pơhiơ̆ bơih. Noh hăm tơdrong kĕ đei noh duh ưh kơ adrô̆ tơ-'ngla rôih mă hăm nhôn duh 'meh vă athei vei lăng mă tơnăp hloh, jang tơnăp tơdrong âu. Adoi hơpơi 'meh đơ̆ng găh tơmoi truh tơmang tơ̆ Buôn Đôn, truh lăng rôih đĕch, nĕ chă yŭn rôih ôh, vă đơ̆ng noh bơ̆n gơh vei rong rôih erih  xot đunh roi 'lơ̆ng. Kiơ̆ pơkăp atŭm kơ apŭng adoi nhen đơ̆ng kon pơlei noh đei tơdrong drơ̆ng nơ̆r thoi âu”.

Tơchơ̆t jang âu đơ̆ng anih jang kơpal păng jơnŭm pơgơ̆r tơring đei tơmoi truh tơmang lăp đon. Ƀok Nguyễn Xuân Thủy, tơmoi đơ̆ng dêh char Vĩnh Phúc lơ 'măng năm truh Bản Đôn tơmang lăng akhan, um ai rôih hlôi tơguăt hăm tơring teh Bản Đôn lơ xơnăm kơ âu păng đei tơmoi lơ̆m păng 'nguaih kơ teh đak băt truh. Mă lei, kiơ̆ ƀok Thuỷ, yŭng rôih năm tăp dăr tơring tơmang păng găn đak krong Srêpốk pă đei hơvơn lơ tơmoi bơih; tơdrong tơplih dôm trong tơmang pơhiơ̆ tơ̆ âu noh trŏ ƀlep hloh: "Bơ̆n athei pơdơh lê̆ tơdrong tơmang pơhiơ̆ chă yŭn rôih kơlih hăp hli hlơt. Hơnơ̆ng 3 – 4 'nu tơ-oei yŭn rôih yak tăp dăr lơ̆m tŏ xĕt jơ noh duh ưh đei hơ-iă kiơ. Unh hnam inh hlôi năm truh tơmang tơ̆ Thái Lai. Tơ̆ âu, đe xư jang tơmang pơhiơ̆ găh rôih rơgei tơpă. Bơngai Thái kron rôih lơ̆m hơdrong đei pơga tang găn, pơgơ̆r ăn rôih đă ƀơlŏng, pơlong kơdâu maraton, pơm xiêk ... noh 'lơ̆ng tơpă. Kon hơ-ioh inh dơ̆ng tơjê̆ pơga noh tơrĕk hăm rôih đang kơ noh iŏk prit ăn rôih xa tôch xơđơ̆ng..."

Pơmai Hà Nhi Phương Thảo, tơmoi đơ̆ng pơlei tơm Hồ Chí Minh truh tơmang Bản Đôn tơroi tơbăt, dang ei khul rôih rong tơ̆ Đăk Lăk tŏk bŏk oei tơjur tenh kuăng kơyuơ ưh đei chông kon. Tơdrong iŏk rôih jang tơmang pơhiơ̆ nhen yŭn rôih gô pơm ăn kơ rôih roi tơjur tenh hloh, phŏ pơm ăn kơ rôih hiong hơdrĕch. Tơdrong jang tơmang pơhiơ̆ tơ̆ tơring tơplih dôm tour tơmang pơhiơ̆ tơrĕk truh rôih tơpă gô 'lơ̆ng hơ-iă hloh: "Kiơ̆ inh kơchĕng noh athei pơjing dôm tơdrong jang tour tơmang pơhiơ̆ tơrĕk truh rôih noh nĕ chă pơgơ̆r tour yŭn rôih ôh. Pơtih nhen pơjing đei dôm tour chă hơlen băt gru jơ̆ng rôih tơ̆ Bản Đôn, pơgơ̆r dôm tour vang akŏm chă chŭp um, tơhŭm păng vei lăng năng tông rôih, ưh đei pơtoi chă yŭn rôih kơnh pơrăm truh jơhngơ̆m jăn rôih, đang kơ noh rôih gô hiong hơdrĕch".

Oei hơdơ̆r đunh kơ âu 2 xơnăm, minh 'nu tơmoi truh đơ̆ng apŭng Khoái Châu, dêh char Hưng Yên vang năm akŏm tour tơmang yŭn rôih tơ̆ Tơring tơmang pơhiơ̆ Bản Đôn (apŭng Buôn Đôn), ưh kơ pŭn noh ƀơm rôih tơih huăng tơ̆ teh pơm rơka hơbur năm kâ̆p kư̆u tơ̆ hnam pơgang. Đơ̆ng rŏng kơ đei tơdrong âu, kơdră tang măt ăn Kŏng ti jang Tơmang pơhiơ̆ Biệt Điện hlôi tơlĕch tơbang pơdơh hloi tơdrong jang tour tơmang pơhiơ̆ chă yŭn rôih.  

'Nao âu, Jơnŭm jang vei lăng kon pơlei dêh char Đăk Lăk hlôi hơlen Tơchơ̆t găh pơkăp tơgŭm rôih yŏng chông kon. Kiơ̆ kơ noh, jên mong tơ̆ tơring gô tơgŭm 500 rơbâu hlj ăn tơ-'ngla rôih yŏng lơ̆m minh năr păng 600 rơbâu hlj ăn tơ-'ngla rôih tơno lơ̆m minh năr, tơgŭm lơ̆m 30 năr ăn bre rôih mă pơkăp đôi dih băl. Mưh rôih yŏng chông kon, tơ-'ngla rôih pơtoi đei tơgŭm dơ̆ng 300 rơbâu hlj minh năr lơ̆m 10 khei blŭng chông kon, 600 rơbâu hlj minh năr tŏk đơ̆ng khei mă 11 truh ăh khei mă 6 đơ̆ng rŏng kơ rôih kon.