Đơ̆ng năr 1/7, atum lơ̆m teh đak, dêh char Dak Lăk hlôi tơlĕch jang kiơ̆ khul kơdră chĕp pơgơ̆r ƀar kâp. Đĭ đăng 102 tơring, phương lơ̆m dêh char Dak Lăk hlôi iung jang kiơ̆ lơ̆m bơ̆ jang hăm kmăi kmŏk, atŏk kơtang tơplih kơsô̆ lơ̆m pơm hla bơar ou to. Kon pơlei năm truh tơ̆ Hơnih bơ̆ jang tơm tơring, phương mă kăl pơm hla bơar kăl nhen: tư pháp hộ tịch, pơm hla bơar ăn kơ nge ‘nao hơnhơl, tơroi tơbăt găh ŭnh hnam hiong răm, ƀao hiêm jang pơgang, pơm hla bơar mơ̆t oei, pơm hla bơar teh, pơm hla bơar năm hŏk,… Rim kang ƀô̆ bơ̆ jang lơ̆m hơnih hlôi pơm joăt jang kiơ̆ phân mêm atŭm lơ̆m dêh char. Mă kăl, Viễn thông Dak Lăk hlôi ăn rim bơngai joăt jang phân mêm păng bơngai bơ̆ jang kih thuơ̆t năm bơ̆ jang tơgŭm djru lơ̆m tơdrong bơ̆ jang pơm hla bơar ou. Dôm tơdrong iung jang hơdrin hrơ̆p mĭnh ƀơ̆r đon ou tơgop pơjing rơvơn kơtang hloh ăn kon pơlei mưh năm pơm hla bơar ou to.