Kiơ̆ tơbăt đơ̆ng Hơnih vei lăng kon pơlei dêh char Đak Nông, Grŭp jang kmăi kmŏk gar tơmo-mŭk drăm lơ̆m teh Việt Nam (TKV) đei Hơnih tơm vei lăng Mŭk drăm bri brăh păng Cham char ăn hla bơar asong sir iŏk mŭk drăm char char tơ̆ sơlŭng Bauxit Nhân Cơ, apŭng Đắk R’lấp lơ̆m hơgăt teh 3.074ha, khei ‘năr jang lơ̆m 30 sơnăm.

Truh dang ei TKV hlôi sir iŏk đĭ Bauxit lơ̆m hơgăt teh 310ha. Găh hơgăt teh au dang ei tŏk bŏk chưk ƀŭ, pơtăm ‘long keo vă tơgŭm ăn hơmet pơ ‘lơ̆ng cham char. Kiơ̆ hla bơar tơbăt hơlen tơdrong ƀơm truh cham char đei kĭ pơkăp, hơgăt teh au lăp đơ̆ng rŏng đĭ khei ‘năr ăn asong sir iŏk mă pơdreo ăn tơring. Kiơ̆ đơ̆ng Hơnih vei lăng kon pơlei dêh char Đak Nông, hăm hơgăt teh sir iŏk đĭ Bauxit să lơ lau tôch ‘lơ̆ng hơ iă vă dêh char hơvơn rim tơdrong vă jang tơmơ̆t jên jang atŏk tơ iung mŭk drăm, tơpôl păng đei hơgăt teh ‘lơ̆ng vă pơjing choh jang sa, oei sa tơgŭm ăn dơ̆ng tơdrong vă jang sir iŏk Bauxit.