Tơ̆ Hnam Khop tơm Kon Tum, tang măt ăn Tĭnh uy, Anih jang vei lăng kon pơlei, Anih jang Măt trâ̆n tôh kuôk Việt Nam dêh char Kon Tum,  ƀok Dương Văn Trang – Ƀĭ thư Tĭnh uy Kon Tum thơ thâu hơ-iă hăm đe ƀok soi păng kon pơlei kiơ̆ khop Kŏng yăo minh pơyan Nô-el sơnêp sơnua. Ƀĭ thư Tĭnh uy Kon Tum sơkơ̆t hơdah tơdrong vang jang kăp gĭt đơ̆ng  rim bơngai pơgơ̆r păng kon pơlei kiơ̆ khop vang jang tơdrong pơlong jang băt 'mêm kơ teh đak, tơgŭm jơhngơ̆m atŭm hăm Anih jang Đảng, jơnŭm pơgơ̆r tơring pơjing dêh char Kon Tum roi năr roi hơtŏk tơ-iung.

Ƀok Dương Văn Trang adoi pơma dơnuh hăm đe ƀok soi gah tơchơ̆t jang kơ dêh char đơ̆ng dang ei truh đĭ sơnăm 2025 tơgŭm ăn rim unh hnam hin dơnuh hơmet jê̆ 1.600 tŏ hnam hyah hyok, vă kon pơlei đei anih oei xa sơđơ̆ng hloh. Ƀok hơpơi 'meh, khei năr truh, hăm tơdrong pơtho tơƀôh đơ̆ng đe ƀok soi, kon pơlei kiơ̆ khop tơ̆ Tơring khop Kon Tum pơtoi kiơ̆ tơdrong jang đei jơnei, hơrih “tơnăp trŏ hăm êbiang khop”, tơguăt tơguăl atŭm jơhngơ̆m pơjing pơlei pơla Kon Tum roi năr roi pơdrŏng 'lơ̆ng rŏ.