Pơkăp hơmet anih jang hanh chĭn, Lâm Đồng đơ̆ng 137 anih jang hanh chĭn tơ̆ xah jur oei pă 51 xah, phương, tơjur 86 anih jang hanh chĭn, hơtŏ hloh 62 % (ưh kơ jô̆ 2 xah Ninh Gia kơ apŭng Đức Trọng păng Bà Gia kơ apŭng Đạ Huoai vei nhen so). Dang ei, dêh char adoi oei hăt hot pơkăp tơmơ̆t hơdai 3 dêh char Lâm Đồng, Bình Thuận păng Đăk Nông jing dêh char 'nao kiơ̆ tơchơ̆t đơ̆ng Ƀan châ̆p hanh Trung ương Đảng.

Đơ̆ng rŏng tơmơ̆t hơdai, dêh char Lâm Đồng 'nao să truh 24.233km2, kơsô̆ măt bơngai jê̆ 3,3 triu 'nu, jing dêh char să hloh lơ̆m jơ̆p teh đak. Lơ̆m tơdrong pơkăp tơmơ̆t hơdai, dêh char Lâm Đồng kơchĕng truh hơtuch khei 12/2025 đei 1.097 kan ƀô̆, bơngai jang lơ̆m dêh char pơdơh pơm jang. Dêh char asong hloh 1.140 ti hlj vă kla jên pơdơh jang ăn kơsô̆ kang ƀô̆ ou kiơ̆ Tơchơ̆t 178/2025 đơ̆ng Jơnŭm pơgơ̆r teh đak.