Lăp đơ̆ng rŏng ƀă lôch, mĕ kơdau jăk oh A Ưng, hơdrung Jrai, hnam oei tơ̆ pơlei Grập, tơring sơlam teh đak Mô Rai, apŭng Sa Thầy, dêh char Kon Tum đei kang ƀô̆, ƀô̆ đô̆i găh Kơđông  Ƀô̆ đô̆i vei lăng sơlam teh đak Mo Rai sơng iŏk rong ‘me.

Yak hloh 4 sơnăm, dang ei A Ứng hlôi hŏk lăm 7 păng hlôi joăt hăm tơdrong erih sa lơ̆m Kơđông vei lăng sơlam teh đak. A Ứng adoi pơm kiơ̆ 11 tơdrong pơkăp lơ̆m năr păng 3 tơdrong pơkăp lơ̆m giĕng nhen lĕ mĭnh ‘nu ƀô̆ đô̆i. Đơ̆ng mĭnh ‘nu hơ ioh kơdơ̆ mơlau, gơnơm đei kang ƀô̆, ƀô̆ đô̆i Kơđông Mo Rai lăng ba, pơtho khan A Ứng roi năr roi rơhao:“Rim năr đe ‘nhŏng lăng ba ĭnh tôch kơ dêh, chă pai ăn por ‘nhot. Ĭnh sŏng sa đang ‘nŏh năm hŏk ƀai hloi. Mư̆h rơhơi ‘nŏh ĭnh hơpuih hnam, tơgŭm ăn đe ‘nhŏng jang. Ĭnh ‘meh hŏk Toán, đơ̆ng rŏng au kơnh mon ‘meh pơm ƀô̆ đô̆i nhen đe ‘nhŏng đe ma vă vei lăng sơlam teh đak”.

Jĭ bơngai đei kơdră chĕp pơgơ̆r Kơđông Mo Rai pơjao jang rim năr chơ ba, pơtho pơhrăm A Ứng hok, Trung úy Hoàng Như Thanh, Kơdră vei lăng Khul tơblăh tơbăt: A Ứng ‘noh bơngai hơgei, hơdrin hŏk pơhrăm. Vă jang keh đang nhen mĭnh ‘nu bơngai ƀă đei pơjao, Trung úy Hoàng Như Thanh hlôi chă hŏk pơhrăm dôm trong rong ‘me bơngai hơ iŏh:“Ĭnh ‘nao hŏk đang, sơnăm au ĭnh 23 sơnăm, tim lah pơm ƀă đe hơ ioh kơna đei pơjao vei lăng năng tông mon au jĭ ba hơdrin. Ĭnh jei chă hŏk pơhrăm dôm trong pơtho khan ăn hơ iŏh đơ̆ng ‘lơ̆p. Truh dang sơnăm dang yơ, kăl pơtho ăn tơdrong yă kiơ ‘noh ba jei hơdrin chă hŏk pơhrăm, chă apĭnh đe ‘nhŏng, đe mih ba tơgŭm ăn”.

Truh dang ei hlôi đei 14 kơđông ƀô̆ đô̆i vei lăng sơlam teh đak tơ̆ dêh char Kon Tum sơng iŏk 15 ‘nu đe mon oei ‘lơ̆p vă rong ‘me.Dôm đe mon au jĭ bơngai mơti mơtĕk mơnat tôch mơnat. Hăm rim đe mon hŏk tro tơnap tap, hơdrin hŏk pơhrăm, jang kiơ̆ tơdrong jang “Ba oh năm tơ̆ hnam trương”, kang ƀô̆ ƀô̆ đôi vei lăng sơlam teh đak Kon Tum hlôi vei lăng năng tông ăn 75 ‘nu mon, rim khei mĭnh ‘nu mon đei tơgŭm ăn 500.000 hlak jên.

Hăm tơdrong jang “Ba oh năm tơ̆ hnam trương-Kon rong kơđông Ƀô̆ đô̆i vei lăng sơlam Teh đak”, lơ̆m dôm sơnăm au ki kang ƀô̆, ƀô̆ đô̆i vei lăng sơlam teh đak Kon Tum oei tơgŭm lơ hŏk tro tơ̆ 13 tơring sơlam teh đak kơ dêh char iŏk đei tơdrong hơpơi ‘meh vă năm tơ̆ hnam trương ‘moi kiơ̆ tơgŭm djru tơtom păng hăm dôm tơdrong jang hơdăh. Mŏ Y Ly, hơdrung Brâu, oei tơ̆ pơlei Đak Mê̆, tơring Bơ Y, apŭng Ngŏk Hôi tơbăt, tơdăh ưh kơ đei tơdrong tơgŭm djru đơ̆ng Kơđông Ƀô̆ đô̆i vei lăng sơlam teh đak ‘Măng sơlam Apŭng plĕnh teh Bơ Y, kon drŏ kăn mŏ ‘nŏh mon Y Uyên dang ei tŏk bŏk hŏk lăm 8 rŏ năng gô pơdơ̆h hŏk bơih:“Đe ‘nhŏng tơgŭm djru kon jên sŏng sa, hŏk pơhrăm, phe jei đei đe ‘nhŏng chă răt ăn hloi. Ŭnh hnam bơ̆n bơnê kơ đe ‘nhŏng tôch kơ dêh. Klo akăn măr nhi jei pơtho khan ăn kơ hăp hơdrin hŏk pơhrăm truh tơ̆p truh troch vă hoei lao đon jơhngơ̆m đon tơgŭm djru đơ̆ng đe ‘nhŏng”.    

Đơ̆ng tơdrong lăng ba, tơgŭm djru, hơlêm đơ̆ng kang ƀô̆, ƀô̆ đô̆i kơ Ƀô̆ đô̆i vei lăng sơlam teh đak dêh char Kon Tum, rim đe kon ‘nŏh kon rong Kơđông ƀô̆ đô̆i vei lăng sơlam teh đak, găh tơdrong jang “Ba oh năm tơ̆ hnam trương” dăh mă ŭnh hnam tơnap tap jei gơh găt păng tôch hơdrin hŏk pơhrăm. Lơ̆m prăt dôm sơnăm au ki atŭm hăm bơ̆ jang vei lăng năng tông tơdrong pơm tơm trong sơlam teh đak hơtăih 292km tơtil hăm ƀar teh đak boăl Lào păng Campuchia, khul bô̆ đô̆i vei lăng sơlam teh đak Kon Tum oei tơgop tôch gĭt kăl hăm tơdrong jang “Pơjing bơngai tơ̆ tơring sơlam Teh đak.