
Năr hơtuch giĕng, mŏ Rơ Mah H'Dịu - Bí thư Đoàn xăh Ia Kriêng, apŭng Đức Cơ, dêh char Gia Lai krao lơ druh dăm, hơioh iĕ hơkŭm tơ̆ Hnam hŏk hôp tơpôl vă ăn đe ngê̆ nhơ̆n, kră pơlei pơtho tanh hơkăt păng tôn chĭng. Lơ grŭp bôl boăl mơlôh ngôi tăp dăr đe kră pơlei, năng đe kră chă blăh pơ o, sĭt tơnanh… Grŭp to ‘noh chơt hơiă vang pơhrăm tôn chĭng.
Drŏ kăn Bí thư đoàn xăh Rơ Mah H'Dịu ăn tơbăt, tơdrong ‘nâu đei lơ̆m tơdrong jang “Pơlei tanh reo, tanh hơkăt kơ đe druh dăm”: “Tơdrong jang ‘nâu, đei đơ̆ng đon tơchĕng mưh kơdih kâu inh ƀôh đe ‘lơ̆p hle, đe druh dăm tơ̆ pơlei ưh pă gơ̆h tanh hơkăt, tanh kơđum kơđŏng kiơ bơih; lăp hơdrô̆ đe kră đĕch gơ̆h tanh. Yoa thoi noh, inh vang jang hăm đon hơpơi ‘mĕh druh dăm sơnăm mơlôh ƀôh păng vang tơiung ming dơ̆ng tơdrong tanh sĭt đơ̆ng đe yă ƀok sơ̆”.

Tơdrong jang “Pơlei tanh reo, tanh hơkăt kơ đe druh dăm” iŏk đei yaih như̆k lơ̆m tơdrong thi đon tơchĕng iung jang xa ‘măng VI sơnăm 2022 dêh char Gia Lai păng mât lơ̆m grŭp 40 kơ Tơdrong thi iung jang xa đơ̆ng druh dăm tơ̆ tơring tơrang sơnăm 2023 yoa Trung ương Đoàn pơgơ̆r. Tơdrong jang sơng đei lơ druh dăm kon kông vang jang păng hlŏh 700 ‘nu hŏk tro tơ̆ tơring vang truh akŏm.
Kŭm hăm tơdrong jang ‘nâu, mŏ Rơ Mah H'Dịu - Bí thư Đoàn xăh Ia Kriêng oei tơlĕch jang đei yoa ‘lơ̆ng trong jang druh dăm “2 ưh, 2 đei” tơ̆ tơring sơlam: “Hŏk pơhrăm kiơ̆ ƀok Hô găh vei kơjăp tơdrong juăt, jŏh ayŏ kơ dŏ xoang kơ hơdrĕch kon kông, tơ̆ plei Hrang, Đoàn nhôn pơjing Khul tôn chĭng klơk vă tơiung dơ̆ng jơhngâm đon hưch ‘mêm kơ pơlei pơla, vei kơjăp tơdrong juăt đơ̆ng bơngai Jarai ăn chăl hle. Kiơ̆ đơ̆ng noh, pơlung đe druh dăm chă hơlen năng păng vei kơjăp tơmam tôn reh ‘nŏh jĭ chĭng klơk tôch hơiă đơ̆ng bơngai Jarai. Nhôn pơgơ̆r ngôi pơchơt, pơtâp hơri hơxoang, ngôi hơdai hăm đe druh dăm tơ̆ plei nai. Nhôn krao đe kră pơlei, đe ngê̆ nhơ̆n truh pơma nuh, tơroi hơ ‘mon, tôn chĭng, reh tĭng nĭng, tĕh chĭng klơk ăn đe bôl boăl mơlôh mơ̆ng”.

Tơdăh tơ̆ tơring sơlam đei hơdruh Bí thư Đoàn xăh Rơ Mah H'Dịu tôch hưch ‘mêm, ‘mĕh chĕp vei, tưk tơiung tơdrong juăt, jŏh ayŏ kơ dŏ xoang kơ bơngai Jarai, chơt hơiă jĭ 1 lơ̆m 100 ‘nu kăn ƀô̆ Đoàn lơ̆m teh đak iok đei tơmam hơpăh Lý Tự Trọng sơnăm 2025, ‘nŏh tơ̆ xăh Ia Ka, apŭng Chư Păh, dêh char Gia Lai, ƀok thây Siu Sắt iŏk đon rơgei đơ̆ng kơdih vă tơgŭm ăn kon pơlei jang chĕh phe kơjăp ‘lơ̆ng.
Trong jang tang găn tŏ phang pơđang ăn ‘long chĕh phe lơ̆m pơyan phang păng trong jang tuh hăm mơ̆r tôch đei kon pơlei jang cheh phe Tây Nguyên tơrek truh. Tơdrong hlôh vao âu hlôi đei ƀok thây Siu Sắt (bơngai Jarai) tơ̆ plei Mrông Yố 1, xăh Ia Ka, apŭng Chư Păh, dêh char Gia Lai roi tơƀôh lơ̆m mang tơpôl, sơng đei rơbâu ‘nu bơngai năng: “Adrol sơ̆, inh hŏk Sư phạm Điạ lý tơ̆ Đaị học Sư phạm Quy Nhơn. Sơnăm 2015 inh chă hơkăn, hnam hơkăn inh tơ̆ Ia Ly, inh ƀôh tĕh tơ̆ noh xă, ‘lơ̆ng, tŏ 'mi kial tôch lăp vă pơtăm chĕh phe. Mă lei kon pơlei Jarai tơ̆ âu jang cheh phe tam mă đei trong jang kơjăp 'lơ̆ng. Inh tơchĕng jĭ đoàn viên druh dăm athei tơchĕng hơlen, chă trong pơm thoi yơ vă tơgŭm ăn kon pơlei đei trong jang trŏ, jang tŏk chĕh phe kơjăp 'lơ̆ng ƀiơ̆”.

Đơ̆ng rŏng 10 sơnăm, ƀok thây Siu Sắt kŭm hăm hơkăn sư ‘nŏh Rơ Châm Awưnh pơjing đei tơring pơtăm chĕh phe hăm mơ̆r păng pơjing Công ty pơm hơmet tơmam đơ̆ng choh jang xa Jrai Ialy. Trong jang, pơm tơlĕch chĕh phe đơ̆ng công ty lăp hăm tơdrong hơgăt Organic păng VietGAP, pơm đei 3 tơmam: Cheh phe Robusta ƀôt ‘lơ̆ng, Robusta ưh đei hrâu păng Robusta ‘lơ̆ng iŏk hơnăn “Jrai Ialy Coffee”, iŏk đei hla ar chih tơbăt tơmam OCOP 3 sơ ‘nglŏng. Công ty jang hơdoi hăm 50 unh hnam kon pơlei jang chŭn mir vă atŏk tơiung tơring pơtăm cheh phe hăm mơ̆r, akŏm đĭ đăng teh xă 40 ha. Kiơ̆ đơ̆ng noh, tơgŭm ăn kon pơlei Jarai tơplih ming đom tơchĕng mưh pơtăm chĕh phe, năm truh trong jang hăm mơ̆r.
Tơroi găh tơdrong ‘nâu, ƀok thây Siu Sắt ưh đei hiơt nơ̆r pơtho đơ̆ng Ƀok Hô: “Ƀlŏk nơ̆r Ƀok Hô pơtho, ƀok yă sơ̆ đei kŏng pơjing teh đak, tơblăh tang găn hơyăt ‘nŏh bơ̆n jơhnơr kon sâu athei tơiung pơjing teh đak kiơ̆ đơ̆ng dôm tơdrong jang, hơnhăk đon rơgei đei hŏk pơhrăm vă jang kiơ̆ tơ̆ yăn âu. Bơ̆n athei adrin akŏm mih ma duch nă lơ̆m pơlei, vang jang xa, athei mât 1 ƀơ̆r đon tơgŭm băl nhen nơ̆r Ƀok Hô tơtă “Mât mĭnh ƀơ̆r đon, ‘mêm băl, rim tơdrong jang gô keh ‘lơ̆ng ngăl”.

Dôm sơnăm âu ki, tơdrong hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô đei rim anih jang đoan lơ̆m dêh char Gia Lai năng kăl, tơlĕch jang ‘lơ̆ng kiơ̆ lơ tơdrong jang. Lơ̆m dêh char hlôi tơlĕch đei hlŏh 10.500 tơdrong jang kơđe druh dăm, đei kơjă hlŏh 150 ti hlak jên. ‘Nhŏng Đỗ Đức Thanh – Phó Bí thư chĕp kơ̆l Đoàn dêh char Gia Lai ăn tơbăt, đơ̆ng sơnăm 2018 truh dang ei, tơ̆ trang điên tư kơ Anih jang đoan dêh char hlôi roi tơbăt hlŏh 400 ‘nu bơngai jang rơgei lơ̆m rim tơdrong:
“Hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô inh ƀôh 1 tơdrong tôch đei yoa ‘nŏh jĭ chă ƀôh păng pơih xă, pôk pơ ư lơ bơngai jang rơgei. Đơ̆ng noh, pơjing đei 1 tơdrong jang vă đe đoàn viên hŏk pơhrăm, pơlung băl jang mă ‘lơ̆ng ƀiơ̆. Nhôn vă hơnơ̆ng tơplih ‘nao trong roi tơbăt, tơrek truh tơdrong pơjing đei lơ tơmam roi tơbăt lơ̆m mang tơpôl. Lơ̆m đĭ đăng Đoàn ‘nŏh rim kăn ƀô̆ đoàn jĭ 1 ‘nu bơngai tơnăp ‘lơ̆ng vă đe đoàn viên druh dăm hok pơhrăm păng jang kiơ̆. Tơdrong pôk pơ ư bơngai jang rơgei mưh jang kiơ̆ nơ̆r Ƀok Hô vă nhôn hơnơ̆ng pơjing jơhngâm pran ‘nao lơ̆m tơdrong krao hơvơn hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô”.
Viết bình luận