Pha hăm hơkâu tơkhĕl iĕ nhen hŏk tro jăl mônh păng hơkâu jăn ưh kơ ‘lơ̆ng, Chương Đình Phúc, (rơnĕh sơnăm 2005), sinh viên sơnăm 2, lăm Sư phạm Nơ̆r Anh, khoa Nơ̆r teh đak đe, Hnam trưng Đại học Tây Nguyên pơm ăn bơngai tơƀâp pơma nuh hăm sư tôch hiôk jơhngâm yoa trong pơma xa gơ̆h, chơt rơhău păng tơdrong adrin yak hlŏh pơmat tat đơ̆ng sư. Phúc jo hơmren 2 păh ty, jơhngâm pran ưh jăng, oei ‘lơ̆p đei lơ tơdrong pơmat tat yoa mĕ ƀă hrĕch hơchăng băl ƀât oei ‘lơ̆p pơm ăn kơ sư ưh pơ̆n lĕch ngôi hơdai hăm bôl boăl. Hăm tơdrong tơgŭm đơ̆ng dôm bơngai jŭm dăr, Phúc hŭt lê̆ đon hrơ mơlou, adrin hŏk pơhrăm păng vang jang lơ̆m dôm khul grŭp tơpôl, jing bơngai jang rơgei lơ̆m rim tơdrong tơ̆ jăl hŏk phô thông păng đăi hŏk. Phúc kŭm jing 1 lơ̆m 2 ‘nu bơngai mơlôh rơgei hlŏh lơ̆m tơdrong “Pơ ư pơ ang đon adrin Việt” sơnăm 2024.

Chương Đình Phúc tơroi, 5 tơdrong Ƀok Hô pơtho đei hŏk rơbot đơ̆ng ‘lơ̆p jing tơdrong tơƀôh trong chong glung vă ‘nhŏng adrin hŏk pơhrăm păng rim năr. Mă đơ̆ng pơmat tat găh hơkâu jăn, ‘nhŏng oei hơpơi ‘mĕh jing bơngai chă pơma tơƀôh rim tơdrong păng jing 1 ‘nu ƀok thây pơtho ăn đe oh hŏk trŏ: “Oh ‘mĕh mưh hŏk đang ‘nŏh oei hơnơ̆ng kiơ̆ kiơ̆ Ƀok Hô, ‘nŏh jĭ mưh ba hŏk đei tơdrong kiơ bơih ‘noh chă pơtho tơƀôh ăn bơngai nai dơ̆ng. Oh ‘mĕh jing 1 ‘nu bơngai pơtho, ưh lăp pơtho găh đon rơgei đĕch mă oei jing bơngai đei gơnang yoa kơjăp ăn dôm bôl boăl đei tơdrong arih xa pơmat tat dơ̆ng, roi tơƀôh ăn dôm bơngai tơƀâp tơdrong ưh hơiă vă đe sư adrin yak hlŏh pơmat tat nhen thoi oh hlôi tơƀâp ƀât oei ‘lơ̆p sơ̆”.

Kŭm chĕp vei nơ̆r ƀok Hô pơtho “tơ̆ yơ kăl ‘nŏh đei druh dăm, tơdrong kiơ pơmat tat ‘nŏh đei druh dăm”, ‘nhŏng Trần Tiến (rơnĕh sơnăm 1992), bơngai juăt jang tơ̆ Lăm Vei lăng Thu – Hla ar, The, Ƀao hiêm tơpôl dêh char Đắk Lắk chă roi tơƀôh, pơgơ̆r lơ tơdrong jang ăn druh dăm hue lăng truh dôm tơring pơmat tat lơ̆m dêh char.

‘Nhŏng lơ ‘măng vang pơgơ̆r tơdrong jang tơgop jơhngâm vei kơjăp, tưk tơiung tơdrong juăt ‘lơ̆ng đơ̆ng hơdrĕch kon kông, nhen kôch hơmet ƀak hơdrâm, hơtŏk đon vei lăng rơgŏh cham char ăn kon pơlei; hơpăh tơmam, tơgŭm jên pơtho tôn chĭng tơ̆ tơring sơlam. Kŭm hăm ‘nŏh, ‘nhŏng Tiến chă hơlen năng, jang kiơ̆ trong tơplih hăm kơmăy sô̆, đei lơ trong jang ‘nao, trong jang rơgei vă tơgŭm ăn kon pơlei kai, iŏk yoa kơmăy trư̆k tuyê̆n, pơjing tơdrong hiôk hian lơ̆m tơdrong pơvih pơvăn păng iŏk yoa dôm tơdrong kăl găh ƀao hiêm tơpôl.

‘Nhŏng Trần Tiến tơroi: “Inh jĭ đảng viên oei mơlôh, kŭm đei chi ƀô̆ pơjing tơdrong ‘lơ̆ng iŏk pơgơ̆r 1,2 tơdrong, chă hơlen năng dôm tơdrong kăl đei chih tôch hơdăh găh hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô. Inh hơnơ̆ng adrin đĭ jơhngâm yoa tơdrong jang atŭm, bơ̆ jang tơdrong jang kơdih ‘nŏh inh hŏk pơhrăm đơ̆ng Ƀok Hô lơ tơdrong găh dodn adrin đơ̆ng kơdih, hơnơ̆ng hŏk pơhrăm vă hơtŏk đon rơgei, hlôh vao ăn kơdih”.

Hăm mŏ Nguyễn Thùy Trang, rơnĕh sơnăm 1992, Bí thư Đoàn phường Ea Tam, plt Buôn Ma Thuột, mă đơ̆ng oei ƀât sơnăm yơ, bơ̆ jang tơdrong kiơ, mŏ hơnơ̆ng băt hơdăh hơnăp jang đơ̆ng kăn ƀô̆. Ƀât 23 sơnăm ‘nŏh pơm Phŏ Kơdră Anih Mặt trận Tổ quốc phường ‘lơ̆p hlŏh kơ dêh char Đắk Lắk, mŏ Trang kơchăng hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô mưh bơ̆ jang.

Đơ̆ng rŏng đei pơjao vei lăng tơdrong jang Đoàn, mŏ tơlĕch đei 7 tơdrong jang druh dăm, pơgơ̆r lơ tơdrong tơgŭm vei sơđơ̆ng tơdrong arih xa tơpôl, adrin krao hơvơn druh dăm năm pơm linh, tơgŭm ăn druh dăm iung jang xa, pơchôp khul druh dăm vang bơ̆jang vei lăng păng tưk tơiung tơdrong juăt jŏh ayŏ kơ dŏ xoang kơ dôm hơdrĕch hơdrung. Kiơ̆ đơ̆ng noh, pơjing trong tơguăt, akŏm jơhngâm  pran ăn druh dăm tơ̆ tơring.

Mŏ Nguyễn Thùy Trang ăn tơbăt: “Kiơ̆ đơ̆ng dôm tơdrong krao hơvơn kŭm nhen chă đŏk hơlen năng găh Ƀok Hô, kơdih kâu hŏk pơhrăm đơ̆ng Ƀok jơhngâm đon tơpăt ‘lơ̆ng, đon adrin păng hơnơ̆ng hơtŏk đon tơnăp đơ̆ng kơdih kâu mưh bơ̆ jang dôm tơdrong đơ̆ng anih jang pơjao. Bơ̆ jang tơpăt ‘lơ̆ng, tơnăp păng pơm kiơ̆ tơdrong hơgăt đơ̆ng anih jang vă pơjing tơdrong pơvei ‘lơ̆ng hơiă đơ̆ng Đảng hăm kon pơlei păng kăn ƀô̆ hăm đoàn viên, druh dăm”.

Hăm dôm tơdrong jang rơđăh ‘lơ̆ng, đei yoa, lăp hăm tơdrong jang păng hŏk pơhrăm, druh dăm sơnăm mơlôh dêh char Đắk Lắk hlôi “Hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô” tôch hơiă. Dôm bơngai rơgei ‘lơ̆ng lơ̆m tơdrong ‘nâu hlôi tưk tơiung jơhngâm hưch hanh ăn đe đoàn viên, druh dăm, tơgop gĭt kăl vă bơ̆ jang kĕh đang ‘lơ̆ng tơdrong jang, hŏk pơhrăm tơ̆ dôm anih jang, khul grŭp, tơ̆ hnam trưng tơ̆ Đắk Lắk.