Dôm năr ‘nâu, công nhân tơ̆ anih jang pơm trong tơƀưh apŭng Mang Yang – Ia Pa, oei bơ̆ jang tôch pơneh mă lei jăl trong kơjung 33km, đei kơjă man hlŏh 195 ti hlak jên, oei vă hiơ̆ ƀiơ̆ kơ năr hơgăt đĕch. Tơlĕch jang đơ̆ng khei 11/2023 păng tơchĕng gô jang đang lơ̆m khei 1/2026, mă lei lơ anih tơ̆ jăl trong oei tam mă chưk pơ ‘ngoăih teh, pơm ăn anih iŏk jang ưh gơ̆h tơlĕch jang.

Ƀok Krung Dăm Đoàn, Phŏ Kơdră vei lăng kon pơlei apŭng Mang Yang ăn tơbăt, lơ anih kăl đei chưk pơ ‘ngoăih teh mă lei tam mă đei yă  teh hơdăh ‘lơ̆ng: “Tơdrong chưk pơ ‘ngoăih teh đei ƀơm truh tơ̆ 33 unh hnam, klĕch 3 xăh: Kon Thụp, Đak Djrăng păng Lơ Pang (apŭng Mang Yang). Dang ei đei 1,2 anih kăl đei yă teh mă rơđăh ‘mơ̆i, Anih vei lăng kon pơlei apŭng hlôi jang hơdoi hăm dôm tơ ‘ngla tơmât jên jang pơm hla ar, vă jăh chih tơlĕch yă teh mă rơđăh vă tơroi ăn kon pơlei, lăp hăm tơdrong hơgăt đơ̆ng khôi luơ̆t.”

Găh tơ ‘ngla tơmât jên jang, ƀok Nguyễn Hữu Sơn, chĕp kơ̆l Anih vei lăng tơdrong jang 01 (Anih vei lăng dôm tơdrong jang tơlĕch jên ming man kơ dêh char Gia Lai) ăn tơbăt, truh dang ei, tơdrong jang ming man ‘nao lăp đei vă jê̆ 61% tơdrong hơgăt đĕch. Anih jang vă adrin hơmet pơ ‘lơ̆ng dôm tơdrong oei tơhlăk, khŏm jang đang adrol kơ ‘năr 30/8: “Tơdrong jang hơdoi ‘nŏh Anih nhôn vă hơnơ̆ng ăn bơngai jang jur bơ̆ jang hăm Khul vei lăng tơdrong hrŭ ‘mong teh păng Anih vei lăng kon pơlei apŭng Mang Yang vă mưh bơ̆ jang đei tơhlăk kiơ ‘nŏh sek tơlang mă hrĕnh hloi. Anih jang oei adrin păng pơtho ăn dôm anih iŏk ming man akŏm kơmăy kơmŏk, khul bơngai jang, tơmam ming man vă hơtŏk hrĕnh tơdrong jang păng jang kĕh trŏ khei ‘năr hơgăt.”

Tơdrong jang Tơring oei xa ter jih Trong Nguyễn Văn Linh (plt Pleiku) kŭm oei bơ̆ jang hiơ̆ hyĭn yoa tam mă chưk pơ ‘ngoăih teh ‘năi. Tơdrong jang đei jên jang truh 260 ti, iŏk yoa jên đơ̆ng trung ương păng vă jang đang đơ̆ng sơnăm 2022 truh 2025. Mă lei tơdrong jang truh dang ei ‘nao jang đei vă jê̆ 60% đĕch. Lơ̆m kơsô̆ vă jê̆ 40ha teh kăl đei iŏk pơdreu, lăp dang 24ha đĕch đe drơ̆ng nơ̆r hăm trong hrŭ ‘mong jên teh….

Đơ̆ng dôm tơdrong ‘nâu, Anih vei lăng kon pơlei dêh char Gia Lai tơlĕch hla ar pơtho ăn dôm anih jang đei ƀơm truh dăr hơlen, hơmet pơ ‘lơ̆ng pơmat tat păng hơtŏk hrĕnh dôm tơdrong jang ming man. Ƀok Nguyễn Hữu Quế, Phŏ Kơdră vei lăng kon pơlei dêh char Gia Lai kŭm hăm dôm anih jang, tơring tơrang oei pơgơ̆r jur dăr lăng tơ̆ yăn âu, vă tơtom đei nơ̆r pơtho hơmet pơ ‘lơ̆ng dôm tơdrong pơmat tat ăn dôm tơdrong jang; hơtŏk hrĕnh tơdrong ming man tơ̆ dôm anih hlôi đei teh, pơm ‘lơ̆ng lăp hăm khei ‘năr hơgăt păng hơmet rim tơdrong ăn jăl bơ̆ jang ming man pơtăl dơ̆ng lơ̆m jăl ‘nao.

“Hơnăp jang chă roi tơbăt tơdrong hrŭ ‘mong jên teh ‘nŏh đơ̆ng khul kơdră tơring. Jur tơƀâp rim bơngai, chă pơma nuh, tơblang hơdăh mă ‘lơ̆ng, đei bơngai athei bơ̆ jang mă tơpăt, mưh bơ̆ jang ƀôh tơdrong kiơ oei tơhlăk ‘nŏh athei tơroi ăn Anih vei lăng kon pơlei dêh char, chă iŏk nơ̆r tơgop păng roi tơƀôh đon tơchĕng đơ̆ng kơdih, akhan jang thoi noh vă hơnhăk ba tơdrong đei yoa ăn teh đak, hơnhăk ba tơdrong đei yoa ăn kon pơlei hai kơna athei Anih vei lăng kon pơlei dêh char tơchơ̆t ăn. Athei tơƀôh hơdăh đon jang tơnăp, khei ‘năr hơgăt nhen hlôi chih vă adrin jang, pơm thoi yơ vă tơlĕch dơ̆ng dôm hơyak bơ̆jang đơ̆ng rŏng” .

Tơdrong Anih vei lăng kon pơlei dêh char Gia Lai oei tơlĕch lơ trong jang vă pơm ‘lơ̆ng ăn tơdrong vei lăng ăn rim tơdrong jang đei jên jang đơ̆ng teh đak ‘nŏh tôch gĭt kăl ƀât jơnăr oei hăt hơmet ming anih jang, khul kơdră pơgơ̆r tơring hrei ‘nâu. Tơdrong mă Anih vei lăng kon pơlei dêh char Gia Lai athei akŏm jơhngâm hơlen năng ‘nŏh jĭ dôm tơdrong jang đei jên jang đơ̆ng teh đak lơ̆m jăl jang đơ̆ng 2021-2025, trong vă jang lơ̆m sơnăm 2025 kŭm nhen dôm tơdrong jang pơtăl dơ̆ng. Atŭm hăm ‘nŏh, Anih vei lăng kon pơlei dêh char athei dôm anih jang đei ƀơm truh akŏm jơhngâm sek tơlang dôm tơdrong tam mă tơlĕch jên jang, dôm tơdrong jang đei jên tŏk iŏk hơdrol tam mă iŏk pơdreu păng dôm tơdrong jang hlôi kĭ tơlĕch jang mă lei tam mă akŏm tôm jên jang. 

Vă hơtŏk hrĕnh tơdrong jang ming man păng pơm ‘lơ̆ng hơnơ̆ng lơ̆m tơdrong vei lăng, Anih vei lăng kon pơlei dêh char Gia Lai pơtho ăn dôm anih jang kơpal păng Anih vei lăng kon pơlei dôm apŭng, thĭ xăh, plt athei pơjao hơdăh hơnăp jang, sek tơlang kĕh rim tơdrong tơhlăk. Mă loi, hăm dôm tơdrong jang ming man păng pơm Anih jang đei ƀơm ưh ‘lơ̆ng đơ̆ng hơmet ming anih jang, khul kơdră pơgơ̆r, dôm anih jang athei hơlen năng, tơlĕch trong hơmet ming mă lăp vă pơm ‘lơ̆ng ăn tơdrong jang, gơ̆h ‘mơ ‘met jên jang, veh ver tơdrong pơhuach kư̆ kă.