Lơ̆m 10 sơnăm ou ki, rim hơnih Đoàn lơ̆m dêh char Gia Lai hlôi iung jang hloh 1.500 tơdrong jang hơdruh tơdăm vang tơ iung pơjing tơring tơrang ‘nao, tơring kơdrơ̆m gơh găt; pơgơ̆r vă jê̆ 200 tơdrong jang “Năr khul Ƀok thây pơgang sơnăm mơlôh pơm kiơ̆ nơ̆r Ƀok Hô”, khăm jĭ, ƀơk pơgang ăn hloh 50.000 ‘nu hơ ioh păng kon pơlei ŭnh hnam tơnap tap. Vei kơjăp jơnei 110 trong jang pơlei Hơdruh tơdăm “2 ưh, 2 đei”, lơ̆m ou akŏm rim tơdrong jang tơ̆ rim tơring hơdrin jang keh đang jing tơring tơrang ‘nao păng iŏk đei jpơnei hơ iă ... Tơdrong lang să hơdruh tơdăm, hơ ioh hŏk pơhrăm păng pơm kiơ̆ Ƀok Hô hlôi đei tơlĕch jang kiơ̆ jơ̆p jang, pơjing đei jơhngơ̆m pran vă hơdruh tơdăm đe hơ ioh Gia Lai hơdrin yak hloh tơnap tap, pơjing đei tơdrong jang sa.  

Kơsơ̆ ‘năr 14/5, Anih jang Đoàn dêh char Đắk Nông pơgơ̆r pôk pơ ư ‘Hơdruh tơdăm hơgei pơm kiơ̆ nơ̆r ƀok Hồ” păng “Đảng viên mơlôh hơgei”. Dôm sơnăm âu ki, tơdrong tơlĕch jang hŏk pơhrăm păng pơm kiơ̆ jơhngơ̆m đon ‘lơ̆ng ƀok Hồ hlôi đei rim kơdră vei lăng khŭl lơ̆m dêh char pơm hơdăh ‘lơ̆ng hăm lơ tơdrong jang, trong jang pơcheh hơgei, đei yua. Kiơ̆ đơ̆ng ‘noh, đei ƀôh roi ‘năr roi lơ hơdruh hơdrăm jang hơgei, dôm bơngai mơlôh đei lơ jơhngơ̆m hơdrin, đei đon tơchĕng hơrih ‘lơ̆ng, ling lang năm hơdrol lơ̆m hŏk pơhrăm, bơ̆jang, pơcheh păng plang jơhngơ̆m jang ăn tơpôl. Tơ̆ jơ pơm lêh, Anih jang Đoàn dêh char Đắk Nông hlôi pôk pơ ư 28 ‘nu hơdruh tơdăm hơgei pơm kiơ̆ nơ̆r ƀok Hồ păng 17 ‘nu đảng viên mơlôh jang hơgei dêh char Đắk Nông jăl jang 2023 – 2025. ‘Nâu jĭ dôm bơngai tôch kơ hơgei lơ̆m hŏk pơhrăm, bơ̆jang, jang sa, iung jang, tơchĕng hơlen khoa hŏk, tơplih ‘nao pơcheh hơgei, tơiung pơjing tơdrong jang sa, pơjing tơring tơrang ‘nao păng vang jang tơdrong jang khŭl, grŭp.