Kon pơlei tơ̆ pơlei Đê Kjiêng, xăh A Yun, apŭng Mang Yang đei pơjao vei lăng 30 ha bri đơ̆ng Pơgar pơkăp kơ Teh đak Kon Ka Kinh. Tô̆ kơtang, phang pơđang đunh năr pơm ăn bri ƀônh ƀơm unh xa pơngơ̆t rim năr. Vă kơchăng tang găn, đe hơdruh tơdăm tơ̆ pơlei Đê Kjiêng hlôi axong băl năm hơlen bri hơnơ̆ng, tơlĕch chă chong muih choh xoh hơmet ‘nhĕt uh lơ̆m bri. ‘Nhŏng Măng, đei pơjao vei lăng bri tơ̆ pơlei ăn tơbăt: “Kang ƀô̆ kơ pơgar jang adoi tơroi tơbăt ăn kon pơlei băt vei lăng bri, kon pơlei athei vei lăng păng pơm kiơ̆ ƀlep, mưh đei tơdrong kiơ noh athei tơroi hloi hăm anih jang, hăm pơgar jang vă vei lăng bri gơh giơ̆ng jơk, tơnăp vă ning mônh kơnh đei xa yua đơ̆ng bri hơ-‘nhăk ăn”

Pơgar pơkăp kơ Teh đak  Kon Ka Kinh đei hloh 41.000 ha bri, pơhiar xă lơ̆m tơring teh kơ 3 apŭng noh apŭng Đăk Đoa, Mang Yang păng Kbang. Ƀok Lê Văn Vinh, Phŏ Kơdră Pơgar pơkăp kơ Tek đak Kon Ka Kinh ăn tơbăt, kơtă ăh blŭng pơyan phang, anih jang hlôi axong kang ƀô̆, bơngai jang hơnơ̆ng chă hơlen, tơguăt hăm tơring, kơchăng tơlĕch jang kiơ̆ pơkăp 4 tơ̆ tơring, atŭm hăm noh akŏm dôm khul jang tang găn păng pĭt unh xa bri. Lơ̆m noh đei tơdrong tơgop tih tên đơ̆ng kon pơlei lơ̆m tơdrong tơgŭm ăn anih jang choh pơ-‘nguaih păng xoh lê̆ ‘nhĕt uh hơlen vă tang găn păng tơjră unh xa bri: “Anih jang akŏm chă tơroi tơbăt ăn kon pơlei tơ̆ thôn pơlei, tơring mă unh hnam kon pơlei jang mir tơjê̆ bri, mưh chă muih choh xoh uh ‘nhĕt noh athei tơroi hăm anih jang vă dăh băt tơroi hăm jơnŭm pơgơ̆r tơring adoi nhen anih jang hơlen bri ‘long. Anih jang adoi iŏk yua dôm trong jang tang găn păng tơjră unh xa bri nhen tơjủ ƀiơ̆ ‘nhĕt uh kro, chă chih tơbang hăm kơƀang tơƀôh trong mơ̆t lĕch tơ̆ bri, jang atŭm hăm xăh păng dôm tơ-‘ngla iŏk vei lăng bri tơjê̆ vă hơtŏk tơdrong jang vei lăng bri”  

Lơ̆m kơsô̆ hloh 60.000 ha bri tơ̆ Mang Yang, đei vă jê̆ 10.000 ha đei xơkơ̆t ƀônh ƀơm unh xa, akŏm tơ̆ dôm xăh: AYun, H’Ra, Đê Ar, Đak Trôi, Đak Djrăng. Kiơ̆ kơ ƀok Nguyễn Công Ngọc, Phŏ kơdră Anih jang hơlen bri ‘long apŭng Mang Yang noh, vă kơchăng tang găn unh xa bri, apŭng Mang Yang hlôi keh đang pơjing Jơnŭm pơgơ̆r jang tang găn păng pĭt unh xa tơ̆ xăh, akŏm 4 tơdrong jang tơ̆ tơring, atŭm hăm noh akŏm dôm khul jang tang găn păng pĭt unh xa bri hăm khul grŭp jang tŏk truh kơ hrĕng ‘nu bơngai, dơnơm noh kon pơlei tơ̆ tơring vă tang găn păng tơjră unh xa bri đơ̆ng mă blŭng hloi: “Hơnơ̆ng ăh pơyan phang, tơdrong jang tang găn păng pĭt unh xa jing tơdrong jang kăl kơ anih jang, tơdrong tơroi tơbăt noh anih jang hơtŏk mă blŭng, hơnơ̆ng pơgơ̆r, tơbăt dôm jơnŭm vei hơlen, dôm tơ-‘ngla iŏk vei lăng bri, Anih jang vei lăng kon pơlei xăh đei bri, dăh kơchăng xơnong jang lơ̆m tơroi tơbăt truh rim unh hnam kon pơlei erih tơjê̆ bri. Anih jang vei hơlen bri ‘long đei khul jang kih thuơ̆t hơlen lơ̆m kơmăi găh hơlen tơroi tenh đei unh xa vă dăh tom tơroi hăm dôm anih iŏk vei lăng bri păng  Anih jang vei lăng kon pơlei dôm xăh đei bri dăh tom tơpăt unh xa, ưh đei lê̆ kơtôch unh xa rok truh tơring nai”