Năr 21/2, Anih jang vei lăng 'long bri Gia Lai đei hla bar pơkăl dôm anih jang mă po vei hơlen dăh tenh kuăng jang hadoi hăm apŭng Kông Chro hơlen tơdrong koh ot 125 tơm 'long bri tơ̆ anih pơkăp kơsô̆ 7, kơsô̆ 10 tơring bri 792 tơring teh kơ Kŏng ti jang găh 'Long bri Kông H’de, tơring teh pơkăp kơ xăh Sơ Ró, đei ƀôh băt ăh năr 15/2 âu ki.

Adrol kơ noh, kiơ̆ kơ tơdrong tơroi đơ̆ng tơm bri noh Kŏng ti jang găh 'Long bri Kông H’de, Anih vei hơlen 'long bri apŭng Kông Chro jang atŭm hăm dôm anih jang đei tơrĕk tơlĕch chă hơlen tơdrong phă bri tih xă lơ̆m tơring teh kơ kŏng ti âu vei hơlen.  Đơ̆ng noh ăn ƀôh, đei 125 tơm 'long bri lơ̆m tơring teh kơ Kŏng ti jang găh 'long bri Kông H’de, đei 'long kơpah, kơchĭk ƀơm koh ot. Hơkŏp kơsô̆ 'long ƀơm koh ot noh truh 30,2m3. Dang ei, rim anih jang đei tơrĕk tŏk bŏk oei hơmet hla bar kăl chih răk găh tơdrong âu, chơ chă dôm bơngai pơm yoch, xek tơlang kiơ̆ ƀlep khôi luơ̆t pơkăp.