Bơ̆ jang 6 tơdrong đơ̆ng Ƀok Hô pơtho ăn khul linh Công an kon pơlei, khei ‘năr âu ki, Công an Gia Lai hơnơ̆ng hơmet pơ ‘lơ̆ng rim tơdrong pơmat tat, akŏm jơhngâm vei lăng ‘lơ̆ng tơdrong sơđơ̆ng tơ̆ rim anih jang kăl păng tang găn tơdrong yoch, vei lăng tơdrong sơđơ̆ng tơpôl păng pơjing khul linh.

Kiơ̆ kơ ‘nŏh, Công an dêh char kơchăng tơlĕch jang hrơ̆ch, ‘lơ̆ng rim tơdrong jang, tơtom sek tơlang dôm tơdrong tơtŏ găh tơdrong sơđơ̆ng lơ̆m tơpôl; sek tơlang tơtom dôm tơdrong tơgar băl, hil băl lơ̆m kon pơlei, ưh ăn đei tơdrong tơtŏ đunh, jing krê hơmơt găh tơdrong sơđơ̆ng. Chă ƀôh tang găn păng phă đei lơ khul chông bơngai kon kông kơdâu tơ̆ tĕh đak đe, sek tơlang lơ bơngai pơm glăi găh tơdrong sơđơ̆ng  tĕh đak. Kŭm hăm ‘nŏh, Công an dêh char Gia Lai oei jang đang trŏ khei ‘năr tơdrong pơm, ƀơk păng vei lăng kăn kươk kon pơlei… 

Tơ̆ lêh tơbăt, 2 khul grŭp, lơ bơngai iŏk đei Ƀăng khen đơ̆ng Kơdră tơm vei lăng Công an; 20 khul grŭp, lơ bơngai iŏk đei Ƀăng khen đơ̆ng Kơdră vei lăng kon pơlei dêh char Gia Lai păng 50 khul grŭp, lơ bơngai iŏk đei hla ar Hôn bơnê đơ̆ng Kơdră chĕp kơ̆l Công an dêh char Gia Lai yoa jang đei jơnei rơgei ‘lơ̆ng lơ̆m tơdrong pơjei băl jang kiơ̆ 6 tơdrong đơ̆ng Ƀok Hô pơtho ăn khul linh Công an kon pơlei.