Ƀok Phạm Mạnh Hùng, Phŏ Kơdră chĕp kơ̆l Radio nơ̆r pơma Việt Nam, Kơdră vei lăng Khul châm hơlen blŭng a ăn tơbăt, đơ̆ng rŏng kơ châm hơlen lơ̆m kơsô̆ hlŏh 4.000 ƀai chih vang thi đơ̆ng 163 anih chih hla ar tơroi, Khul châm hơlen blŭng a rơih đei 725 ƀai chih. Mă hơtuch, Khul châm hơlen pơma nuh, rơih iŏk 105 ƀai chih mât lơ̆m vŏng thi mă hơtuch.

Dôm ƀai chih chih kiơ̆ tơdrong arih xa tơ̆ yăn âu, chih găh lơ tơdrong, roi tơƀôh lơ tơdrong ‘nao ‘lơ̆ng hơiă lơ̆m tơdrong chĕp kơ̆l pơgơ̆r đơ̆ng Anih tơm Chinh trĭ, Khul kơdră chĕp kơ̆l Trung ương jăl XIII, Tổng Bí thư Tô Lâm, mă loi jĭ dôm tơdrong kăl đei tơlĕch ăn teh đak păng rim anih jang chinh trĭ vă hơmet mă ‘lơ̆ng rim tơdrong, khŏm hơnhăk teh đak bơ̆n yak tŏk lơ̆m chăl ‘nao. Dôm ƀai chih roi tơƀôh tôch hơiă găh dôm tơdrong jang đơ̆ng Quốc hội păng Jơnŭm pơgơ̆r kon pơlei jơ̆p tơring, akŏm lơ̆m 3 hơnăp jang gĭt kăl đơ̆ng Quốc hội ‘nŏh jĭ chih pơjing luơ̆t, dăr lăng păng tơchơ̆t dôm tơdrong tih gĭt kăl kơ teh đak.