Hlŏh 1 giĕng âu ki, tơ̆ Hnam khop tơring Châu Sơn, xăh Cư Êbur, plt Buôn Ma Thuột, kon pơlei kiơ̆ khop Ƀă yang vang hơmet pơ ‘lơ̆ng cham hnam vă sơng năr Noel. Bu bu kŭm chơt hơiă ‘nă hal. Bơngai chô̆ kơ ƀŏng điên, bơngai pơm hang đá, var rơmo, bơngai pơdơ̆ng ‘măng jang, pơm hơlen tôch ‘lơ̆ng, pơrŏ var rơmo tih tôch hơiă. Ƀok Trần Trọng Khánh, ƀok pơgơ̆r thôn 2, xăh Cư Êbur tơroi: “Rim sơnăm kiơ̆ tơdrong juăt nhôn pơm hang đá, var rơmo kŭm nhen pơrŏ pơ ‘lơ̆ng tơ̆ trong pơlei vă hơmet ăn năr lêh Noel, păng kiơ̆ jơhngâm đon âu ‘nŏh jĭ pôk pơ ư ƀă yang, pơm thoi yơ vă hơtŏk tơdrong tơguăt mĭnh ƀơ̆r đon hăm kon pơlei công giáo kŭm nhen đĭ đăng kon pơlei tơ̆ jơ̆p tơring.”

Dôm năr âu ki, mă đơ̆ng oei hăt phĕ chĕh phe ră, mă lei kon pơlei lui công giáo xăh Ea Tiêu, apŭng Cư Kuin, oei ‘măn jơnăr hơmet ming hnam hơkŭm tơ̆ tơring. Chă rơih plei kơchai vă pơrŏ tơ̆ ‘long hơngo Noel, ƀok Nguyễn Phước Thành, tơ̆ thôn 1, xăh Ea Tiêu, apŭng Cư Kuin ăn tơbăt: “Pơting hăm sơnăm sơ̆ ‘nŏh noel sơnăm ‘nâu chơt ƀiơ̆, yoa yă tơmam tŏk, pơma atŭm rim hnam hơmet pơ ‘lơ̆ng hnam kơdih ngăl. Kŭm pơm bơ̆n hang đá unh hnam, kueng ƀôt, pơrŏ hơmet tơ̆ rim trong tơklăh. Năng tôch kơ hơiă.”

Kŭm ƀĕnh jơhngâm đon chơt hơiă vă sơng Noel, mŏ Trần Thị Anh Thi, tơ̆ phường Tân Thành, plt Buôn Ma Thuột tơroi, đe tĕch mơdro tơmam Noel sơnăm ‘nâu tôch lơ, hăm lơ kơloăi tôch ‘lơ̆ng hơiă, rim bơngai gơ̆h rơih răt kiơ̆ kơdih ‘mĕh vă: “Inh hơmet pơrŏ Noel kiơ̆ tơdrong juăt lơ̆m rim sơnăm kơ unh hnam nhôn. Hnam nhôn đei tôm tơmam vă hơmet pơrŏ, mưh truh pơyan Noel ‘nŏh iŏk ‘long hơngo so pơrŏ dơ̆ng, yă kiơ ưh kơmăh ‘nŏh năm răt thim. Nhen sơnăm ‘nâu inh ‘mĕh đei kơmâu hu kơna năm răt dơ̆ng lơ tơmam kơmâu hu.”

Mŏ Lê Thị Kim Anh, tơ ‘ngla anih tĕch tơmam tơ̆ trong Lý Thường Kiệt, plt Buôn Ma Thuột ăn tơbăt, pơyan Noel sơnăm ‘nâu, đei lơ tơmam pơrŏ tôch ‘lơ̆ng, tơƀôh hơdăh tơdrong pơm hơmet tôch hơlen hăm rim tơmam: “Sơnăm ‘nâu đe năm răt hrôih ƀiơ̆, mă loi jĭ dôm anih tĕch mơdro, anih huch chĕh phe đe hơmet pơrŏ đơ̆ng hrôih vă sơng tơmoi truh ngôi. Kơplăh dang ei lăp hơdrô̆ unh hnam nhôn đĕch oei pơrŏ hăm ‘long hơngo păng pơm hloi hang đá. Mŭk drăm roi tŏk, tơdrong ‘mĕh vă roi kơjung kơna athei pơm hơmet tơmam mă ‘lơ̆ng ‘năi.”

Mĭnh pơyan Noel oei vă truh hăm jơhngâm đon čhôk nă kon pơlei kiơ̆ lui công giáo Đắk Lắk, oei yak truh 1 sơnăm ‘nao ƀĕnh tơdrong chơt hơiă ‘nă hla păng hiôk chơt.