Pơgê năr 20/02, tơ̆ Hơnih tơm Ƀô̆ đô̆i, Tổng cục Chính trị Ƀô̆ đô̆i kon pơlei Việt Nam jang hơdoi hăm Khul Lý luận Trung ương, Hơnih pơm tơlĕch Kơsơ̆p hla bơar Chính trị Quốc gia Sự thật pơgơ̆r Pơma đam khoa hŏk Hơlen hơdăh jơhngơ̆m đon chĕp pơgơ̆r pơrô̆ jang lơ̆m kơsơ̆p hla bơar “Kơrŭn đĭ jơhngơ̆m iung tơjră tang găn sa pơgơ̆m pơjĭp, tơgop tơ iung pơjing Đảng păng Teh đak bơ̆n roi năr roi rơgoh ‘lơ̆ng, pran kơtang” đơ̆ng Tổng Bí Thư Nguyễn Phú Trọng lơ̆m jang kiơ̆ jơnei tơdrong jang vei lăng năng tông Teh đak hrei au.

Đại tướng Phan Văn Giang, Kơdră jang lơ̆m Hơnih tơm Chĭnh trĭ, Kơ iĕng Kơdră chĕp pơgơ̆r Đảng Ƀô̆ đô̆i Trung ương, Yŏng Khul ƀô̆ đô̆i vang năm. ‘Măng pơma đam pơgơ̆r kơtă păng trư̆k tuyên tơ̆ 41 hơnih pơdăh lơ̆m khul ƀô̆ đô̆i hăm 1.600 ‘nu bơngai vang năm.  Tơ̆ pơma đam, rim kơdră tang măt hlôi akŏm pơm hơdăh dôm tơdrong lơ̆m kơsơ̆p hla bơar, dôm tơdrong đei ƀôh hơdăh đơ̆ng yan au lơ̆m bơ̆ jang tang găn sa pơgơ̆m pơjĭp, tơdrong yoch au to hăm tơdrong jang tơ iung pơjing păng vei lăng Teh đak Việt Nam xã hội chủ nghĩa hrei au păng tơ iung pơjing khul ƀô̆ đô̆i kĕch mang, pran kơtang, gơ̆h hơgei păng hơbĕch hơbal.