Kơdră Kuôk hô̆i Vương Đình Huệ pơgơ̆r hop akŏm. Pơma tơ̆ hop akŏm, đei lơ bơngai tang măt adoi pơma hơdăh, tơdrong Tơchơ̆t kơ sô̆ 594 đơ̆ng Anih chĕp kơ̆l pơgơ̆r Kuôk hô̆i pơtho tơdrong jang dăr hơlen đơ̆ng Jơnŭm pơgơ̆r kon pơlei rim tơring ‘noh jĭ trong jang khôi luơ̆t tôch kơ gĭt kăl, ‘lơ̆ng vă pơm tơplih, pơm ‘lơ̆ng, kiơ̆ trong hrơ̆ch 1 ‘măng, đei yua tơdrong jang dăr hơlen đơ̆ng rim anih jang kon pơlei rơih.

Pơma pơtôch tơ̆ hop akŏm, Kơdră Kuôk hô̆i Vương Đình Huệ athei Jơnŭm pơgơ̆r kon pơlei rim dêh char, pơlei tơm bơ̆jang kiơ̆ ‘lơ̆ng 6 tơdrong jang tơm, lơ̆m noh, tơchĕng hơlen, hơmet ming, tơmơ̆t dơ̆ng vă jang kiơ̆ hrơ̆ch 1 ‘măng dôm trong jang ‘nao đơ̆ng Đảng, teh đak, mă loi ‘noh jĭ dôm tơdrong Tơchơ̆t đơ̆ng Anih tơm Chĭnh trĭ găh hơtŏk tơiung mŭk drăm - tơpôl dôm tơring.