Ƀlep ƀât tơbăt 92 sơnăm năr pơjing Khul druh dăm CS Hồ Chí Minh, pơgê hei (17/3), Ban Bí thư Trung ương Khul druh dăm CS Hồ Chí Minh pơgơ̆r Hop akŏm "Nơ̆r pơma đơ̆ng sơnăm mơlôh – Tơdrong bơ̆ jang đơ̆ng Đoàn". Hop akŏm pơgơ̆r kơtă păng pơih kiơ̆ trong trư̆k tuyê̆n hăm anih jang đoan dôm dêh char, plt păng anih jang đoan, khul tơ̆ tĕh đak đe hai.

Hop akŏm đei 2 jăl: Jăl mă mônh đei hơnăn "Tơiung jơhngâm pran đơ̆ng sơnăm mơlôh vă pơjing tĕh đak hơnŭk hơnoa, hiôk chơt" pơma găh dôm trong jang pơm hơtŏk tơdrong ‘lơ̆ng, đei yoa đơ̆ng pơtho pơhrăm; dôm tơdrong jang kăch mang; pơgơ̆r pơjing Đoàn - Đoàn vang bơ̆ jang tơiung pơjing Đảng; pơih xă tơdrong pơchôp khul druh dăm păng tưk tơiung jơhngâm đon bơ̆ jang tơgŭm, tơguăt 1 ƀơ̆r đon, gơ̆h hơgei, nuih mơng đơ̆ng sơnăm mơlôh vang tơgop ăn tơdrong tơiung pơjing tĕh đak hơnŭk hơnoa, hiôk chơt kiơ̆ tơdrong Tơchơ̆t đơ̆ng Hop akŏm Đảng lơ̆m tĕh đak ‘măng mă 13. Jăl mă ƀar hăm tơdrong tơm ‘noh pơma nuh găh dôm trong jang đơ̆ng Đoàn, Khul lơ̆m tơdrong vei lăng, tơgŭm ăn druh dăm, hơiŏh iĕ jang tŏk tôm tơdrong.