Hơnơ̆ng hop akŏm mă 44, kơsơ̆ năr 25/4, Hơnih bơ̆ jang Kuô̆k hô̆i pơma dơnuh găh trong vă pơjing Tơdrong tơchơt găh ăn hok đĕch hăm lăm mâm non truh hŏk tro lăm 12 hnam trương teh đak đơ̆ng sơnăm hŏk 2025-2026. Tơlĕch jang kiơ̆ Nơ̆r pơma pơtôch đơ̆ng Hơnih tơm Chinh trĭ năr 1/3/2025 găh tơdrong ăn hŏk đĕch ưh kơ ăn jên hăm hŏk tro mâm non reuh hŏk tro lăm 12, Tơdrong tơchơ̆t gô tơmơ̆t dơ̆ng rim bơngai đei ăn asong hŏk đĕch lơ̆m hnam trương teh đak, tơgŭm jên hŏk ăn hŏk tro hnam trương kon pơlei pơjing. Kiơ̆ chih jô̆ sơnăm hŏk 2023-2024, dang ei lơ̆m teh đak đei 23 triu 200.000 ‘nu hŏk tro. Akŏp kon jên teh đak kla ăn dang 30 ti 600 triu hlak jên. Găh lơ kơdră lăp đon hăm tơdrong kăl vă pơjing Tơdrong tơchơ̆t, tơbăt hơdăh tơdrong kăl kơ chăl chĕp pơgơ̆r hơtŏ hơnơ̆ng lơ̆m tơdrong hŏk pơhrăm păng hơnăp jang kơ Teh đak hăm bơngai hŏk, vei lăng năng tông ăn jơhnơr mơlôh păng sơđơ̆ng tơdrong hơrih sa tơpôl. Mă lei, rim kơdră athei kăl lăng hơlen mă brĕ găh tơdrong chă klăh asong kon jên jang teh đak kơ rim tơring, mă kăl hăm dôm tơring tơnap tap vă sơđơ̆ng jang kiơ̆ tơdrong jang tơgŭm djru ou.